Siaha-ah World AIDS Day

District AIDS Prevention and Control Committee Siaha huaihawtin Zirtawpni khan Siahaah ‘World AIDS Day’ hman a ni.
District AIDS Prevention and Control Committee chairman, bawrhsap Lalhmunsanga Hnamte chuan HIV darh zel tur ven kawnga thawktute zahna chibai a buk tih a sawi a. HIV do kawngah kohhran, NGO leh khawtlang mipuiin theihtawp chhuah a tul tih sawiin, thawhhona tha hnuaiah Siaha district-ah HIV kai pung loa, hniam lam a pan zel a beisei tih a sawi.
SA-ICTC councellor Zingia Hlychho sawi danin, tun dinhmunah Mizoram chu a mi cheng zat nena chhutin India rama HIV kai tamna ber a ni a. HIV/AIDS kaina tam ber chu mipat hmeichhiat hman atangin a ni. Mipat hmeichhiat hman kawngah fimkhur a tul hle tiin, insum theilote chu condom hmang turin a chah. Inchiuna hriau thianghlim lo atanga kai an tam a, a bikin heroin khawihten an kai nasa zual. Damdawi khawih thinte chu hriau thianghlim chauh hmang thin turin a chah bawk. Thisen thianghlim lo dawn palh avanga kai pawh awm theih a ni, tiin, “Vanduaina vang a ni a, fimkhur zawka thisen endikna pawh kalpui zel a ni,” a ti.
HIV kaite nena chenho, hnathawhho leh thosi seh atangte in a hrik a kai theih loh a , HIV kai theih dan leh kai theihloh dan hrechiang a, HIV kaite endawng lo turin a chah.
Mara Chano Py Gen. Hqrs president P Chaki pawhin HIV do kawngah theihtawpa penchhuak turin Siaha mipui a sawm a. A bikin chhungkaw nuten fa an enkawl kawngah tan la thar tur leh HIV/AIDS kai lo turin chhungkuaah zirtirna tha kalpui thin turin a chah.