Siami hoin Spain leilungah India champion
Siami hoin Spain leilungah India champion
Pathianni khan Barcelona khuaah 100th Anniversary Spanish Hockey Federation – International Tournament final khelh niin, Kolasib nula Lalremsiami telna India women’s team chuan sithum faia mualneitu Spain sawp chungin Spanish Hockey Federation kum 100 tlin lawmna tournament trophy an sualchhuak.
Inrinni khan striker Siami ‘hat-trick’ siam hmangin India hmeichhe team hian 3-0 bawkin an hmelma lian England an lo sawp tawh a, kha kha Spanish Hockey Fede-ration tournament-a India chak vawi-khatna niin, Pathianni final-ah erawh Mizo nula hian goal a khung ta lo a, Vandana Katariya (22nd minute), Monika (48th) leh Udita (58th)-te goal hmanga hnehna changin, vawihnih chiah chak mah se tournament chhunga tlawm nei loin India chief coach Janneke Schopman leh a naute’n trophy an hawn.
Inrinni Terrassa khaw inkhela England laka Lalremsiami ‘hat-trick’ chungchang kha han thual nawn leh lawk ila.
Siami hi England nulate lakah chungnung taka inlanin, minute 13-naah a goal hmahruai a thun a, minute 17-ah belh lehin, a goal thumna erawh a fan ta deuh a, minute 56-ah ‘hat-trick’ a puitlin.
India nulate hian team pathum inelna tournament-ah hian karliamta tir lam khan England (1-1) leh Spain (2-2) an inhnehtawkpui zet a, an intum nawn lehah Mizo player goal thum hmangin England lakah hnehna nuamsa an chang a, Pathianni final-ah pawh tournament thlengtu Spain lakah sithum faiin hnehna an sualchhuak zui leh ta a ni.
Inrinni England game kha kum 23 mi Lalremsiami’n ram tana game 112 a khelh tlinna chiah niin, kha game-a a ‘hat-trick’ nen Spain ram tournament-ah goal li a thun tling a, England goalie Sabbie Heesh tan hling hnawksak a tling!
Mipa team pathumna…
100th Anniversary Spanish Hockey Federation – International Tournament khel tura sawm ve bawk Indian men’s hockey team chuan pathumna ni chungin tournament an khar thung.
Pathianni vek khan India mipa team chuan third-fourth placing match-ah 2-1-in reigning FIH Hockey Pro League champions Netherlands an hneh a; India goal pahnihte hi penalty corner ve ve atanga lut niin, captain Harmanpreet Singh (15th) leh Dilpreet Singh (50th)-te’n chakna goal ni zui ta an thawh a, Dutch team goal neih chhun hi Thierry Brinkman (25th)-a tihluh a ni ve thung.
Indian team hian vawiin chawhma lamah Chennai an lut ang a, August ni 3 atanga Mayor Radhakrishnan Hockey Stadium-a khelh tan tur Asian Champions Trophy lamah an inlan zui leh nghal ang.