Siddaramaiah an PM Modi chhang let

Bengaluru in tui lama harsatna namenlo a tawh hnuah Prime Minister Narendra Modi chuan Karnataka a ruling Congress te chu na taka beiin ‘tech city chu tanker city’ a chhuahah a puh chu Chief Minister Siddaramaiah chuan chhang letin Karnataka in tuilian leh khawkheng nasa tak a tawh lai khan khawnge i awm a ti ve thung.
Lok Sabha seat 28 awmna Karnataka hian inthlan thawh hnihin April 26 leh May 7 ah inthlan an hmachhawn dawn a. Bengaluru seat te chu April 26 ah inthlanna neih a ni ang.
Bengaluru a rally a neihnaah Prime Minister chuan ram tihhmasawn a duh thu sawiin Congress te chu “anti-investment, anti-entrepreneurship, anti-private sector, anti-taxpayer, anti-wealth creator” tiin a puh a.
“Modi chuan ram chu green energy hub, pharma hub, electronics hub, electrical vehicle hub, semiconductor hub, leh global innovation hub ah ka siam ang a ti chuan India chu hub of Global economy a ni dawn a ni ka ti a. Mahse, Congress leh INDIA alliance chuan Modi paihthlak tur an ti thung” tiin a sawi a.
“Modi guarantee angin 5G kan hmang tawh a, tunah 6G kan tlangzarh dawn a, mahse, Modi paih tur an ti. Modi guarantee chuan AI a thlen ang a, mahse, Modi paih tur an ti. Modi guarantee angin Chandrayaan hnuah India chuan Gaganyaan a kalpui a, mahse Modi paih tur an ti. Congress hi anti-youth a ni, a chhan chu anti-investment, anti-entrepreneurship, anti-private sector, anti-taxpayer, anti-wealth creator an ni tlat a ni” tiin a sawi bawk.
Prime Minister chuan BJP leh Janata Dal-Secular te tangkawp chuan Karnataka mipui te duhthusam an tihlawhtling dawn a ti a.
“In duhthusam tihhlwhtlin hi ka tihtur a ni a. Ka nun hi in tan leh ram tan ka hlan a ni. Kum 2047 hma chu 24×7 ka tiam che u” tiin a sawi a, chu chu kum 2047 a India developed rama hlankai goal a sawina a ni.
“Congress te chuan tech city chu tanker city ah an chhuah a. Agriculture budget te tihniamin urban infrastructure lam an pun a. Congress te chuan eirukna bak an ngaihtuah lo va, Bengaluru harsatna an ngaihsak lo. Central sorkar project te chauh chak takin a kal a ni” a ti bawk.
Chief Minister Siddaramaiah chuan natakin Prime Minister Modi thusawi chu chhang let thungin ‘Mipui te tan 24×7 hnathawh intiam si, Karnataka in tuilian leh khawkheng rapthlak a tawh lai khan khawiah nge i awm? 24×7 story dik tak hi eng nge? Engtik lai pawhin PR mai zawk a ni’ a ti.
Chief Minister chuan Prime Minister in Karnataka a Chikkaballapur chungchang sawia Congress in loneitute an phatsanna a tih pawh a chhang let a.
“Loneitu tenau te tan PM Kisan Samman Nidhi scheme kan kalpui a. Karnatka in BJP sorkar a neih lai chuan loneitu ten Rs 10000 theuh an dawng a, Central sorkarin Rs 6000 pe in Karnataka BJP sorkar in 4,000 a tum thung a. Mahse, Congress tena sorkar-na an chan veleh loneitute hnena Rs 4,000 pek an titawp” tiin Prime Minister Modi chuan a sawi a.
Hei hi chhangin Chief Minister chuan Prime Minister chuan loneitute hamthatna a duh takzet em tih a chhia leh tha hriatna hmang nawn teh se tiin kum 2020-21 a Delhi border a loneitute movement siam chu a sawi a, kha lungawilohna kalpuiah khan loneitu 700 chuangin nunna an chan a nih kha tia sawi bawkin Prime Minister hian loneitute chungchang sawi turin moral position a nei lo a ti bawk a.
Tun thlengin Centre chuan loneitu tena Minimum Support Price guarantee an ngiat chu an tihlawhtling duh lo a, thlai chi leh fertiliser ah GST an la zui zel bawk a ti bawk.
BJP te chu a tir atang renga anti-farmer an ni ti bawkin Siddaramaiah chuan, “Capitalits, businessman leh traders te party a ni. BJP te DNA chu anti-farmer poison a khat a ni” tiin Siddaramaiah chuan a sawi bawk a.
Karnataka loneitute chuan tute nge an tana tha leh tu te nge anti-farmer te chu an hrechiang khawp a, inthlan hunah zirlai an zirtir ang tiin Siddaraimah chuan a sawi bawk.