Sikul kal turin sipai hnena dil ngai

Sipai hnenah sikul kal an dil chu a ni lo a, sikul an kal theih nan gate hawng turin sipai an dil a ngai. Chutiang chu |iau chhak Zorama Zofate dinhmun a ni.
Champhai district-a Zokhawthar-ah |iau ral, Myanmar lama Zo hnahthlakte’n sikul an kai thin a, Myanmar lam hi an buai avanga hun engemaw chen zirna in an khar bakah, tun hnaia an hawn hnu-ah pawh sorkar nei mumal lova kal an nih avangin, engemaw zat chu Zokhawthar-ah hian an la kal. Kar hmasa lam atang khan India sorkarin Myanmar lam leh Mizoram lama mite inkalpawh a phal ta lo a, chuvangin Myanmar lam atanga Zokhawthar-a sikul kalte’n gate hawnsak turin sipai an dil a ngai ta thin a ni.
Myanmar leh Mizoram inkalpawhna, |iau lui lei Zokhawthar lamah hian Assam Rifles an duty a, mihring inkalpawh hi phal lo mah se sikul naupang hi ngaihhnathiam an ni.
Myanmar lam atanga Zokhawthar-a sikul kalte hian gate-a duty Assam Rifles te hnenah gate hawn an dil a, an lo hawnsak hnuah chhinchhiah an ni thin. Sikul bana an haw dawn pawhin gate hawn hi an dil leh a ngai. Assam Rifles te hian tha takin an lo hawnsak thin a, sikul uniform hate lei kaltlang turin harsatna an tawk hran lo.
Zokhawthar-a Mizoram Police te’n an chhinchhiah danin, April ni 17-ah khan Myanmar atangin zirlai 120 te’n lei an kan a, ni 18-ah chuan chhinchhiah an awm lo. Ni 19 kha Lok Sabha inthlan ni a nih avangin sikul chawlh a ni a, ni 20 leh ni 21 chu Inrinni leh Chawlhni niin, ni 22 (Thawhtanni) khan zirlai 121 te’n lei an kan.
Sikul naupang hi a then chu high school kal tawh, tleirawlte an ni tawh a, a naupang lam chu pawl 1 te an ni. A naupang lamte hi chu hruai ngai te an la ni a, an chhungte’n lei kana an hruai lai hmuh tur te pawh a awm.
Zokhawthar leh |iau lui lehlama khua Khawmawi leh a chhehvel khuate hi hnam khat an ni mai lo a, inthian tha, chhung leh khat, chhiatni thatni-a inkalpawh tawn, khaw khat ang maia awm an ni. Sikul naupangte pawh hi an tlangnel a, primary school naupangte pawh hruai ngai lova tlangnel taka lei kan thei an ni fur.
Zokhawthar VC president Lalmuanpuia chuan police-te chhinchhiah aia tam hi an khuaah Myanmar atanga sikul kal an awm tih a sawi a, India sorkarin inkalpawh a phal loh hnu hian Zokhawthar lama riak ta law law pawh an awm tih a sawi.
Myanmar lam an buai hnu hian Zokhawthara sikul hrang hrangah zirlai an pung tih a sawi a, raltlan naupangte bakah raltlan ni lo, Myanmar lam atanga sikul rawn kal naupang engemaw zat an awm tih a sawi.
Zokhawthar bul vel Myanmar lam hi sipai sorkar paihthlak tuma beitute’n an awp tawh a, sipai sorkar mi leh sa an um chhuak tawh. Sipai sorkar paih tumtute’n a theih ang angin inrelbawlna lam an thawk a, zirna inte pawh an hawng tawh. Mahse thil a mumal rih lo a, zirna inte pawh chu hawng mah se ‘approve’-tu an awm rih loh avangin lehkha zir duh engemaw zat chu Zokhawthar-ah hian an la kal a ni.