Sipaiten inkahhai puang, lirnghingah mi 3,000 thi tawh

Sipaiten inkahhai puang, lirnghingah mi 3,000 thi tawh
Myanmar-a sipai sorkar chuan kar liam taa lirnghing na tak an tawrha chhanchhuah hna thawh a chak zawk theih nan tual chhung indona kal mekah inkahhai a puang a. Lirnghing avanga thi hi mi 3,000 chuang an ni tawh niin sorkar television chuan a puang bawk.
MRTV chuan inkahhai hi April 22 thleng atan a nih thu leh Zirtawpnia lirnghing tuarte puihna kawngah an thawk ang.
A hmain sipai dotu hel pawlte chuan inkahhai hi an lo puang tawh a. Sipaite chuan heng pawlte hian sipai beih chawlhsanin inpunkhawm pawh an bansan rih ang a, sipaite pawhin a tul angin hma an la dawn tih an sawi a ni.
Myanmar-a lirnghing avanga thi hi Nilaini zan thleng khan mi 3,003 an tling tawh a, mi 4,500 chuang hliam an awm niin MRTV chuan a puang.
An thenawm, Thailand-ah chuan thi 22 awm tawhin in za chuang a chhia a, chin hriat loh mi 72 an la awm.
China-a Xinhua news agency chuan Myanmar-a Chinese embassy-in tual chhung Red Cross hnenah chhawmdawl hna thawh nan yan maktaduai 1.5 ($2,06,685) a hlan tih a puang.
Chinese Ministry of Foreign Affairs chuan Thawhlehnia Chinese Red Cross aid convy-te Myanmar sipaiten an kah hnuah an rescue team leh bungrua an thawnte chu a him tin thuthar lakhawmtute a hrilh bawk.
Ministry thupuangtu, Guo Jiakun chuan Beijing-a thuthar lakhawmtute a kawmnaah ‘Myanmar-a pawl leh party tinin lirnghing chhawmdawlna hi an ngai pawimawh ber tur a ni a, China leh ram dang atanga chhanchhuaktu leh an bungrua pawh a him ngei tur a ni’ tih a sawi.
“Bungraw thawnna kawngte hi a inhawngin tihbuai loh tur pawh a ni,” tiin Guo chuan a sawi.
Sipai sorkar thupuangtu, Zaw Min Tun chuan Chinese Red Cross hian engmah hriattirna pe hmasa lovin Thawhlehni zan khan conflict zone an lut a, tual chhung lirtheite an hmang tel a, an dintir mai theih loh avangin van lam hawiin silai an hmet puak ta tih a sawi.
Kum 2021-a Nobel dawng tawh, Aung San Suu Kyi-i kaihhruai mipui sorkar an paih thlak hnuah sipaite hian Myanmar hi an enkawl zo meuh lo va, eibar a harsain ni tin mamawh pawh an tlachham hle.
UN chuan state paruka mi maktaduai 28 chuangin lirnghing hi an tuar nia sawiin ei tur, awmna, tui, inthiarna, rilru lam enkawlna leh thil dang atan hmanhmawh takin $ maktaduai 12 mamawh nghal a nih thu a sawi.
Nilainiah kha chuan dama mi chhanchhuah beiseina a chau tawh hle chungin Myanmar khawpui, Naypyidaw-a khualbuk chim atangin mipa pahnih leh khawpui danga guesthouse atangin mipa bawk an chhanchhuak.
Magnitude 7.7-a nain a sawi hnuah ni nga a liam tawh a, team tam zawk chuan dam aiin ruang an zawng deuh ber tawh.
Thingtlanga Sagaing chu a tuar na ber niin hel pawlin an thunun deuh vek lai a ni a, puitute tan thlen a harsa rih hle.
Nilaini khan Human Rights Watch chuan sipai sorkar chu mi puihna kawng hawng turin a ngen tawh nghe nghe.