Somalia-a Ugandan sipai helicopter tlaah mi panga thi

Somalia-a Ugandan sipai helicopter tlaah mi panga thi
Somalia khawpui, Mogadishu-a an international airport lian bera Ugandan sipai helicopter tlaa kang zuiah a chuang zinga mi panga an thi.
Pilot, co-pilot leh flight engineer chu ‘hliam na tak tuar leh nasa taka kangin’ an dam chhuak niin Ugandan sipai thupuangtu, Maj Gen Felix Kulaigye chuan a sawi a, chetsualna thlen chhan an chhui zui nghal mek tih a sawi bawk.
“Thil puak ri leh mei khu chhuak leh helicopter kang kan hmu a. Meikhu hian helicopter-in a bawh khat vek a ni,” tiin thlawhna tumhmuna thawk pakhat, Farah Abdulle chuan Reuters news agency a hrilh.
Somalia-a sorkar enkawl news agency chuan kangmei chhuak hi Aden Adde International Airport-a emergency services-ten rang takin an thelh mit tih a puang.
Ugandan sipaite hi African Union (AU) hnuaia Somalian sipaiten kum 20 chuang al-Qaeda nena inzawm al-Shabab firfiak pawl an beihna pui tura sipai 11,000 an dah zingah an tel a ni.
Maj Gen Kulaigye chuan helicopter hi ‘an tih dan thin pangngaia combat escort mission-a chhuak’ an nih thu sawiin a bak kimchang a sawi lo.
Somali Civil Aviation Authority hotu, Ahmed Maalim chuan helicopter hi km 90 chuanga hla, Mogadishu hmarthlang lam, Lower Shabelle region-a Balidogle airbase atanga chhuakin tumhmuna sipai awmna lai bik chungah a tla niin a sawi.
Helicopter tla avang hian passenger phur Turkish Airlines thlawhna chhuak tur chu tihkhawtlai a ni a; mahse, tual chhunga thlawk thin dangte erawh a dan pangngaia kalpui a ni.