SOOJI BAI!

JC.Zoremi Hmar Joute

Ka thawmhnaw suk ka tleuh zo, bathroom atanga ka chhuak chuan choka lama ka nu ri rak rak chu hriain ka va phei ve nghal a, hnathawk ho in tur thingpui a lum mek a lo ni. “Awi ka nu…thingpui i lo lum elo, ka laklawh deuh a, ka’n tleuh nghal zuai alawm maw le; khawi ka lo siam ang” Ka ti luam a. A kuta min lo hui zeuh zeuh pah chuan, “Lo kal teh lo kal teh, han hawp chhin teh” tiin thifiana thingpui sen chu mi’n pe a. Han hawp chhin teh…a thlum tawk em? A ti dawn emaw ka tih lai chuan, “Han hawp chhin teh zovi, a thak em?” A ti ta tlat mai le!
Ka ngaih a’n tha lo viau dawn na a, ani hi tawng sual palh ching ngang hi a nia, a sawi sual palh a ni ang e tiin ka inhnem vat a. “A thlum em tih zawk awm tak, a thak em te i tiahh” Ka tih chuan a thingpui ken baw hlawk hlawk khawp chuan a nui ta mai a, ka ngaih a tha thei thlawt lo. A nuih nasat lutuk avang chuan a tawng pawh ka hre hlei thei lo, ‘A thak em ka tia lawm’ a ti ni chuan ka hria. Eng vangin nge a thak ngawt ang tih zawh ka tum lai chuan thingpui bel bula hmarchapui elh bun, paruk vel lo let ram chuan ka zawhna chu min chhang niin ka hria. Nui khur ngat ngat chung chuan, “Thingpuihah khan hmarcha ka telh alawm..” a tih chuan, kan nuih nasat lutuk vangin kan dul kan dawm takmeuh tawh. Baia a hmarcha telh tur thingpuiah zawk a telh palh a lo ni.
Ka’n hawp chhin a, hrawk a thiat hraih mai. Amah lah chuan nui chur chur chung chuan thingpui thing te, bawnghnute te chu a telh belh nghauh nghauh a, paih a, a thar lum mai khan kan hek lo zawk tur a nih vei nen; a thar lum ka rawt pawh chuan a nuih a za tulh tulh mai si a. “Tihian, thak an tih deuh chuan duh leh chi kan chhawp law law ang a.” Te a tia! Pawlh dal ta fe-a kan inhriat hnu chuan ka zu pe ta hlawm a, ka nu lah chu an in zawh hun awm velah a zu chhuk a, bang nghengin a ding ang el awl a, “Vawiin thingpui chu a tui viau lo maw..?” A zu ti! Hnathawk ho chuan, “Tui tehreng mai ka pi, thil telh in nei nge in siam cial deuh a ni maw?” an lo ti ve mai a. Ka nu chuan, “Kan thil telh leh zel in hriat a tul lo, kan sawi dawn teuh lo” tiin a rawn haw san hmiah!
Mi in ang tiat lawih sa ve ang mai hian kan heti roh a, kan nufa buaina tawk a ni ve em em mai thin. In lian a ni hauh lo va, mahse kan sa nasa em em mai a ni. “Garrage tha neih tur a ni e” tiin thuneitu ten an sawi fo a, endik rup rup an tum thu te an sawi fo takah si chuan keini pawhin kan in bul, hmun zim te-a thingtuaia kan sak chu thiatin, neih ang anga sak that kan han rawt ve ta kha a ni a. Kan sak chhoh zel theih chuan tuna kan awmna nen hian dawh zawmin, kan in pawh a lo zau sawt dawn a ni tiin, kan phur ve hle a.
A hmun laih lai atang tawha “A nawm hmel dap dap mang e” kan tih tawh kha a ni a. Ban pali bak phun theih lohna hmun zau lovah, in nuam dup dup deuh sak kan tum a ni. Tichuan khu, kan han pum ta a le, a lo zau lo! A hnuai ber phei khu chu han lut ila Hmunphiah dahna tur a vang nghal em em mai a! Luh chiaha vei lam kha bathroom niin choka a ni nghal a, choka kha sitting room chu a ni leh mai. Chu sitting room-ah tho chuan khum dah a ngai dawn niin a lang a, kan han luh hrim hrim khan tukverha dak reng ang kan ni nghal bawk. Mihringin an luah dawn chuan mihring tereuhte an nih a ngai ang ka ring.
A lehlamah chuan e paha bai vil nghal theih a ni tur te, mu reng chunga Gas cylinder off zeuh theih tur leh, chhuat nawh dawn pawha vawi khat inher mep a tawk mai tur khu erawh chuan enkawl a tihahdam em em dawn niin a lang a, a luahtu chu han che hlek se ama mawng a tauh nawk nawk fo te’n ka’n ring deuh bawk a. A chung zawk khu chu tlemin a zia deuh; mu chunga bai vil dawn chuan tlema a ban ve deuh a ngai mai thei! Chaltlang Indoor stadium atanga thingzai put thlak te, ‘Haih chi khraahh’ tih paha balu inhnek khuar thuk siak leh cement bag ruak tumtel te chu eizawn nan tlak mah suh se kan hneh chhungkua viau mai.
Mistiri kan nei a, Mohit Uddin a ni. Sam kir deuh, eu deuh er ur, vai mistiri zinga mawngfual awmchhun niawm tak leh hmarcha ei ngam lo a ni. “Mohit..” han tih tut kha ka ning deuh a, “Mawia…” Ka ti ta mai. Ani lah a lo lawm ve tumhrang a, vawi hnih khat ka kohva a eih loh chuan “Thangromawi…” ka ti leh mai a. “Thangromawi…” ka tih hmasak ber tum chuan eih ngam chiah si lo hian “He hee…” a ti ringawt a. A hma aia ring leh vinin, “THANGROMAWI” Ka’n ti tuarh a, min melh zoh zoh pah chuan “Awiihh” a ti ve ta a. Tichuan, an tawng ang deuh deuha biain, “Thaw raw guju dui du niii…” Ka tih te, “Laguai chu buzuk thara dai du nii..” ka tih te chu a nuihpui ve huk huk thin.
Tin, nu ka nei a. Keima nu a ni. Chhuat ka nawh avangin ka buai tih a hmu a, nu taima leh mawng zang zet tih takah, vai ho chhun thingpui hmeh tur Sooji a lo siam ta mai a! Kan titi tui dun khawp mai a; thahnem ngai taka a chawh lauh lauh hnu chuan a sen ta thap a, “Umm…tui leih a hun a nih hi tiraw zovi..?” a’n ti a, ka va en zuai a, “A nih kha” ka ti ve mai a. Bawnghnute tui thlum, so bawrh bawrh chu a’n leih ta a, a liam ta buah buah mai a! Sooji tui leih phul ta hluah kan hre ngai si lo, pawnfen tlang invawr suau suau khawpa a chawh pawh chuan a liam tha duh ting emaw tih mai tur hi a ni zel mai a. A’n chhem thul, awmzia a awm thei si lo; a mangang chuan Gas chu a off ta ringawt mai a, Sooji lah chu a phun suap suap a, a tui lung mai si a. Mak ti taka kan en lai chuan a’n liak chhin ta zoh a, biak zui tlak reng reng awm lovin a nui leh ta tliah tliah mai le!
A kaih mai dawn emaw ka tih lai chuan, “Saw…saw…Soda alawm ka kan hi zovi…awi han liak chhin mah teh; a al-a a al dan mai hi!” tiin thirbel chu a kawk a, a nui khur chur chur mai a. Ka nui lo thei tawh bik lo. Soda fun, kg khat bag-a a chanve vel la awm chu, nimin lama ka sooji kan bang emaw tiin Sooji tlem nen a lo pawlh a lo ni a! “Han tem ve chhin mah teh…a tui loh dan hi a rapthlak lutuk..” a ti a, a mittui a hru kuang kuang a. Mahse ka tem duh teuh lo, hmanni lawkah pawh thingpui thak min hawptir a, a tui lo. Tunah pawh hian a tui dawn lo. Sooji bai ka ei duh mai mai lo! “Khawi keima’n ka’n kang ve thung ang e” ka ti a, ka kang ta a. A hmin hnu chuan, “Han ei chhin teh le, kei chu soda tel lo paw’n ka kang tui thiam a nia” ka ti vel ham ham a, “Keipawh soda telh pawhin ka kang tui lo thiam ve tho alawm” a lo ti!