Sorkar lakah Supreme Court thinrim hle

Supreme Court chuan High Court judge atana ruat tura candidate chhawpchhuah te sorkarin thutlukna siam duh lova hun rei tak a tihkhawtlai thin avangin candidate tha ber ber turte kan hloh zel tiin a sawi.
Dan lama hriatna nei tha ‘bright’ ber berte Bench zawm tura law practice turte chu sorkar berin a chhan hriat loh avanga mi duh bik a neih avangin a tuartu an ni mek a ni, tiin Bench of Justices Sanjay Kishan Kaul leh Sudhanshu Dhulia te chuan an sawi.
“Miten min zawm an duh tawh lo. Theihtawp kan chhuah a, talent tha ber ber neih kan tum a. Bench chuan duhdan bik a neih avang hian talent tha kan hloh mek zel a ni. Min bansan a, min inhnuhdawh san a ni. Hming lamchhuah ka duh lo va, mahse, mi tha tak tak kan hloh a ni” tiin Justice Kaul chuan Centre aiawha ding Attorney General R. Venkataramani hnenah a sawi.
Senior advocate Arvind Datar leh advocate Amit Pai, petitioner Advocates Association of Bengaluru-te aiawha ding chuan ‘Collegium-in sorkar hnena hming a thehluh tawhte atanga duh thlan bik a lo nei leh zel chu a zahthlak takzet’ tiin a sawi bawk.
Advocate Prashant Bhushan pawhin sorkar chuan Collegium-in a rawtna te chu tihthin dan namnulin a lo thlang leh thin tiin a sawi bawk a. ‘Collegium in lo ti tawh suh a tih pawhin sorkar chuan a tilui zel a ni’ tiin Bhushan chuan a sawi bawk a.
Tun hi court-in tlang hraka hmalakna a neih hun a ni tawh a, tun ang rengin thil a kal zui zel thei tawh lo tiin Bhushan chuan a sawi bawk.
High Court Collegium-in judge atana mi 70 te hming rawtna a siam tawh chu thla 10 chuang November 2022 atang khan sorkar chuan a hupbet ta char char a ni.
“High Court judge tur post 70 lai a ruakin a awm mek a. High Court Collegium in rawtna a thlen tawh chuan hma laa Supreme Court Collegium hnena pe lut mai tur in ni. Chu chu inti bawk si lo. Chung mite laka ngaihdan dang in neih chuan Supreme Court Collegium-in kan chingfel mai ang a, chu pawh chu in ti chuang si lo. Tunah chungte chingfel tur chuan thla li emaw nga emaw kan la nei a ni” tiin Justice Kaul, top court Collegium member ni bawk chuan sorkar chu a hrilh bawk.
Supreme Court-in judge 26 transfer tura a tihah pawh sorkarin sawi engmah a la nei lo va. High Court judge tura Collegium-in judge pakua hming a rawna thar ber pawh sorkar chuan hmalakna engmah a la nei lo bawk tiin a sawi bawk.
Hming dang pasarih lai Collegium-in High Court hrang hrang atana a rawtte pawh sorkar chuan engmah sawi a nei zui duh lo bawk a. Memorandum of Procedure chuan sorkar chu Collegium-in hming a chhawpchhuah tawh chu appointment pe mai turin a ti a ni, a ti bawk.
Attorney-General Venkataramani chuan karkhat chhung hun pe turin court chu a ngen zui nghal a.
Justice Kaul chuan court pawimawh taka collegium-in Chief Justice tur a ruatna pawh tihkhawtlaiin a awm mek a ti bawk a. Hei hi Collegium-in sorkar chu Delhi High Court judge, Justice Siddharth Mridul chu Chief Justice of Manipur High Court ni tura a ruatna a sawina nia ngaih a ni.
“Kan kan rawt hmingte laka engmah tih a nih loh chuan he case hi ni 10 dan zelah kan khawih zui zel ang a. Vawiin hi chuan Attorney berin hun min dil avangin ka sawi thui lo vang a. Nakin a awm lehah erawh ka sawi teuh ang” tiin Justice Kaul chuan a sawi bawk.
Court chuan Attorney general chu october 9 thleng hun pe-in a tukah ngaihtuah leh turin thutlukna a siam zui ta a ni.