Sorkar rin tawk lohnaah MNF-in NDA thlawp loh rel

India ram parliament monsoon session neih mekah Lok Sabha-ah Congress party-in sorkar rin tawk lohna (no confidence motion) an pulut a, NDA thlawptu MNF chuan NDA thlawp lovin sorkar rin tawk lohna hi thlawp an rel.Thu dawn danin, tun kar tir lamah MNF hruaitute hi an inberawn a, NDA thlawp loh hi an titlu a ni. Thawhlehni zan khan Mizoram MP (Lok Sabha) C Lalrosanga pawh NDA thlawp lo turin an hrilh nghal.
NDA thlawp lova sorkar rin tawk lohna an thlawp tur thu hi MNF president Zoramthanga, Mizoram chief minister thu angin MNF adviser Lalruatkima, cabinet minister-in Nilaini khan a puang a, twitter-ah a pawh hemi chungchang hi a tweet a ni.
“Lok Sabha-a Manipur-a buaina thleng avanga sorkar rintawk lohna (no confidence motion) eptute’n an putluh chu vawiin hian sawiho a ni dawn. MNF chuan dinna nghet leh ngaihdan mumal tak a nei a, MNF MP pawh sorkar rin tawk lohna sawihonaah hian tel ngei tura tih a ni a,” tiin Ruatkima chuan a tweet a, “Manipur-a Zo hnahthlak unaute’n harsatna leh buaina namen lo an tawh hre chung leh an tawrhna te hi kan tawmpui tlat a, sorkar laipui hmalak dan chu a duhkhawpawm loh em avangin, sorkar rin tawk lohna no confidence motion hi MNF MP chuan a thlawp dawn a ni,” a ti bawk.
An party-in NDA thlawp mah se ram leh hnam tana tha tur an ngaihtuah a, ram leh hnam tana tha turin an kal mai tiin Ruatkima chuan The Aizawl Post a hrilh a, “Kan ram, kan hnam kan dah pawimawh a, chu chu kan thutlukna kaihruaitu a ni,” a ti.
“No confidence motion thlawp hi Manipur-a kan unaute thlavang kan hauh theihna a nih avangin thlawp tur kan ti,” a ti a, “MNF hi nationalist party a ni a, tuna kan hruaitute thurel pawh hi nationalism a ni,” a ti bawk.
Sorkar rin tawk lohna motion hi Nilaini khan Lok Sabha-ah an ngaihtuah a, Ningania vote lak tura tih a ni.