Sorkarin zirtirtute sawn hna thawk mawlh mawlh
Mizoram sorkarin higher secondary school zirtirtute a sawn a, zirtirtute an insawn tak tak hmain vawi thum tihdanglam a ni ta.June ni 13-ah khan higher secondary school zirtirtu engemaw zat sawnna notification a chhuak a, hei hi tidanglamin August ni 7-ah zirtirtu sawnna notification dang a chhuak leh. Hei hian June ni 13-a mi a luahlan a, chumi hnuah August ni 14-ah a dang a chhuak leh. A thar ber hian August ni 7-a mi a luahlan leh a ni.
August ni 14-a notification chhuakah hian zirtirtu sawn mi 54-te zinga mi 14-te awmna tur tihdanglam a ni leh.
Zirtirtu sawnna siam\hat nawn fo a ni hian sawi a hlawh a, zirtirtu sawn a nih danin sawi zui a hlawh bawk.
Zirtirtu lam chuan tuna zirtirtu sawn dan hi zirtirtu sem rual tumna lam hawiah an ngai lo. Higher secondary school zirtirtute intelkhawmna Higher Secondary School Lecturers Association of Mizoram (HISSLAM) pawhin August ni 12 khan hemi chungchangah hian lehkha an thehlut a, chumi hnuah tihdanglam a ni leh.
Social media leh titina vela titi luahtu pakhat chu contract-a thawkte’n senior zawkte an luahlan anga thil a kal hi a ni a, seniority list a awm reng chungin sikul \henkhatah seniority list-a lang ve lo contract-a thawkte dah an ni a, a senior zawkte an chhuak a, hei hi titi siamtu pakhat a ni.
Zirtirtu engemaw zat a ruala sawn an nih laiin zirtirtu sem rual tumna a ang lo tia sawi an awm bawk a, tuna zirtirtu an sawn avanga indaih lo sawt turte an awm.
Zirtirtu \henkhat chuan zuam deuh bik an awm em ni tih theih a nih thu an sawi a, hun engemaw chen thingtlanga awm, tun hnaia khawpuia lut, thingtlanga dah leh te an awm tih an sawi. Zirtirtu thawk \ha chawimawina dawng tawhte pawh sawn an nih thu an sawi; August ni 7-a notification chhuakah pawh khan Independence Day-a award dawng tur chu thingtlangah sawn a ni a, award a dawn tur thu hi hriat lawk a ni chunga sawn a ni chu mak an tih thu an sawi. Ani hi August ni 14-a notification chhuakah sawn zingah a tel tawh lo.
Zirtirtu \henkhat chuan notification hmasa ber kha sut (cancel) loh theih loh a nih avanga sut leh ni taah an ngai a, a vawi hnihna pawh hi sawi leh sel a tam avanga sut leh ni taah an ngai. A vawi thumna pawh hi zirtirtu sem rual tumna ang chuang lovah an ngai.