South African footballer an kaphlum

Car hijack tumna lama inkahna chhuakah Kaizer Chiefs defender Luke Fleurs chu Nilaini zan khan Johannesburg khawpui daifema Florida khaw petrol station-ah kahhlum a ni.
Kum 24 leka upa la ni Kaizer Chiefs star hi petrol thun tuma a nghah laiin tute nge an nih hriat loh silai kengin panin, a motor atanga chhuak turin an hrilh a; Gauteng police thupuangtu Lieutenant Colonel Mavela Masondo an tihin tualchhung media-te a hrilh danin, silai keng pakhat chuan hmun leh hmuna tinin footballer chu a chuanna car atangin a pawtchhuak a, chutah a kawng chung lamah a kah chilh ta mai a ni!
|um 12 lai league champion ni tawh leh South Africa rama football club lar berte zinga mi ni bawk Kaizer Chiefs chuan an defeder thihna chu vanduaithlak an tih thu thuchhuah siamin an tarlang a; an website-a an ziah danin Fleurs chu defender class sang tak leh thiamna thuk tak kawltu a nih thu an sawi a; police lamin thil awmdan an chhui zui mek thu leh hmasawnna awm thei ang ang puanzar zui zel an tum thu an sawi.
An ram sports minister Zizi Kodwa pawhin tharum thawhna thleng leh avanga nunna chan a ni leh ta chu pawi a tih thu a sawi ve bawk.
Premier Soccer League chuan tun kartawp top-flight leh second-tier game zawng zawngah Fleurs sunna hun hman a nih tur thu leh inkhelh laiin ngawi renga dinna hun an siam dawn tih an puang.
Ubuntu Cape Town Academy-a kum 2013-a a career tan defender Fleurs hian nikum mai khan Kaizer Chiefs hi zawmin, SuperSport United tan a lo khel tawh bawk.
Under-23 international hlui hian kum 2021 khan South Africa tan Tokyo Olympics football inelna pawh a lo hmachhawn tawh a, senior national team tan la inlan lo mah se a debut hnai tawha ngaih a ni a, mahse, senior tana khel hman loin mual a liam ta a ni.
South Africa hi silai hmanga tharum thawhna thlen tamna ram niin, tunhnai kum engngemawti chhung hian inpawngkahna a thleng chamchi a; police data atanga a lan danin he ram hi khawvela tualthah rate sanberna ramte zinga mi a ni.