South Sudan-ah mi tu tih hriat lohten mi 169 that
South Sudan-a thuneitute chuan Pathianni khan sorkar hotute pawh telin an ram hmarchhaka mi tu tih hriat loh pawlin mi an beihnaah mi 169 an thi tih an sawi.
Ruweng Administrative Area-a Information Minister James Monyluak Mijok-a chuan ralthuam keng thalai tam takin an bei nia sawiin, an thenawm, Unity state atanga kal an nih thu leh Sudan People’s Liberation Army-in Opposition (SPLA-IO) nena inzawmna nei an nih thu a sawi bawk.
SPLA-IO chuan an inrawlh loh thu an sawi thung a, Unity state thuneitute chu tharum thawhna thleng hi politic khelh nana hmangah an puh let.
UN chuan an ram chu tual chhung indonain a tlakbuak leh mai hlauhawm a nih thu vawi tam tak a lo sawi tawh a ni.
“Mithi zingah hian naupang, hmeichhia leh tar 90 an tel a, regional force member 79 an tel a, police pawh an tel,” tiin Mijok-a chuan a sawi.
Mi dang 50-in hliam an tuar a, a tam zawk chu an thenawm, Abyei Administrative Area-ah hruai an ni a, enkawl mek an ni tih a sawi.
Mijok-a chuan BBC hnenah Pathianni zing dar 04:30 (India-a zing dar 08:00) vel khan Ruweng-a Abiemnom county-ah beitute hi an lut a, mi an la mu a, an barakhaih niin a sawi.
A hmuna sorkar sipaite chu ‘an tam hneh hle a… Darkar thum a?anga darkar li inkar indonaah hian pawikhawihtute hian in leh bazar-te chu an hal’ tih a sawi a. Tual chhung sorkar hotu eng emaw zat an thi a, county commissioner leh executive director te pawh an tel.
Mijok-a chuan hemi hnu hian sorkar sipaite chuan beitute hi an um chhuak tawh tih sawiin a hmun hi thuneituten an thunun vek tawh tih a sawi.
Unity state-a thuneituten Ruweng beih tumna hi ‘hriatna an nei sa ngei ang’ tiin a sawi bawk a. He puhna hi Unity state thuneitute chuan an chhang lo va, eng vanga beihna hi thleng nge tih hriat chian a la ni lo.
United Nations Mission in South Sudan (Umiss) chuan civil mi 1,000 vel chuan chhiatna thlenna hmuna a an hmuhhma velah himna an zawng tih a sawi a. Mission chuan darkar 48 kalta chhunga he biala tharum thawhna a pun zel avangin an hlau hle tih an sawi.
Unmiss officer Anita Kiki Gbeho chuan, “Hetiang tharum thawhna hian civil mite chu hlauhawm takah a dah a, tihtawp nghal a ngai,” a ti.
“Mission hian a venhimna dinhmun a tichangtlung a, South Sudan sorkar nen thawkdunin boruak muanawm siam leh khawtlang harsatna tawkte venhimna tura hmalakna hmanhmawh tak takte chu an thlawp a ni,” a ti.
Peacekeeper-te chuan buaina chhuak vanga hliam tuar mi 23 vel an enkawl mek a. Mission chuan tute pawh indona titawp tur leh inbiakna nei turin a ngen.
Tual chhung mite leh AFP news agency chuan thite hi Pathianni khan a ruala phum an ni tih an sawi a, hei hi thi an tam vang leh venhimna lama harsatna awm mek vang a ni.
Nikum khan Abiemnom county-ah hetiang thil thlengah hian civil mi 42 chuang an lo thi tawh.
Khawvela ram naupang ber, South Sudan hi kum 2011-a din a nih atang khan tual chhung indona, retheihna leh eiruknain a tuar nasa hle.
UN chuan kum 2018-a President Salva Kiir leh hun rei tak chhunga a khingpui, Riek Machar te inkara thuneihna insem tura inremna siam theih loh avangin kum kalta chhunga a lo tual chhung indona chhuak chu a la kal zel thei tih a lo sawi tawh.