Southampton mi thar Fernandes

Sporting Lisbon atangin Southampton chuan midfielder Mateus Fernandes an lalut a, a man hi chiang taka tarlan ni lo mah se pound maktaduai 15 vel niin media lamin an tarlang.
Portugal Under-21 international hian kum nga chhung atan Saints hi a zawm a; a chhuahsan tak Sporting first team tan game nga khel hmanin, season liamta khan Estoril-ah loan-in a khel a, Portuguese top flight Primeira Liga a chhuahsan thlengin match 28 a khel tling.
Kum 20 mi chuan England a thleng thei leh Premier League-a a khel thei tur chu a hlim hle tih sawiin, a mumanga a man thin a taka lo chang nen a tehkhin a; Premier League chu a ngaihdanin khawvela league tha ber a nih thu a sawi a, “Coach tha ber ber, player tha ber ber leh team tha ber ber kawltu league a ni a, chuvangin he league hi ka tan a tha a, ka thanlenna atan pawh a fuh a, ka hlim hle a ni,” a ti.
Southampton manager Russell Martin chuan an club tanpui tura Fernandes chu senglut an nih thu sawi chungin, “Mateus kan bihchian chhung hi a rei lo a, chuti chungin phurna sang tak min petu a ni,” a ti.
Kartawp Inrinni hian Premier League match pakhatah Southampton hian Nottingham Forest an mikhual ang.