Spain-a power awm lo kaihhnawihah mi pathum thi

Spain-a power awm lo kaihhnawihah mi pathum thi
Spain ram zau tak huapa Thawhtannia power supply awm lo kaihhnawiha chhiatna thlengah mi pathum vel an thi niin Civil Guard-in an sawi.
Thite hi hmarthlang lama Taboadela khuaa cheng niin chhungkaw khat an ni tih Spanish chanchinbute chuan an tar lang.
Police chuan an thih chhanah hian electricity generator atanga carbon monoxide chhuak an hip chu a ni thei ang em tih an chhui mek a, Civil Guard erawh chuan engmah an sawi lo.
Thuneitute chuan Thawhtannia Spain leh Portugal-a zau taka power a awm lo hi a chhan an la chhui mek zel.
Taboadela-a thite hi nupa leh an fapa puitling tawh a ni tih Madrid-a El Pais chanchinbu chuan a tar lang.
An ruang hi Thawhlehni khan khumah care worker-in a hmu niin El Pais chuan a tar lang bawk.
Thihna thleng dang pawh chhui mek a ni a, heng zingah hian Madrid-a kangmei chhuaka hmeichhe thi pawh a tel a, a thim avanga bati chhi atanga kang kai niin tual chhung chanchinbute chuan an tar lang hlawm.
He hmeichhia hi kum 50 chuang tawh niin Thawhtanni zan khan Carabanchel district-a in kangah a ruang hi hmuh a ni.
Mi dang 13 pawh meikhu hip nasat lutuk avanga enkawl ngaiin an awm a, an zinga panga chu damdawi inah dah an ni tih khawpui emergency information office chuan a sawi.
Nu kum 40 chuang tawh pawh Valencia-ah a thi nia sawi a ni a, Spanish chanchinbute chuan a thih chhan hi an la tar lang hlawm lo.
Tual chhung police chuan he nu hi chuap tha lo a ni a, ventilator a hman chu power a awm loh rual khan a tawp avangin a thi ta niin an sawi niin chanchinbu thenkhat chuan an tar lang.
El Pais chanchinbu erawh chuan damdawi in thuneituten amah hi natna hrang hrang nei sa a ni a, thih dan pangngaia thi niin an sawi tih a tar lang ve thung.
Power awm lo hian Spain leh Portugal ram pum bakah Andorra leh France hmun thenkhat a tuam.
Spain leh Portugal-ah hian traffic light a thim a, metro a tlan thei lo va, sumdawngten card hmanga pawisa inpek an dawng thei lo va, cash machine-ah thui tak tak an intlar a ngaih phah.
Mobile phone network pawh a chhia a, hei hian thu inhrilh tawn zung zung a tikhaihlak nasa hle bawk.