Spain leh England ramten June a lum ber kum tawng

Spain leh England ramten June a lum ber kum tawng
Spain leh England ramte chuan June thla awm tawha a lum ber tum an tawng a, Europe khawmualpui chu khaw lum takin a la tuam chhunzawm zel bawk.
Spain-a weather service Aemet chuan June chu ‘lum tak zet’ tia sawiin chawhrualin 23.6°C a ni a, ‘a hmaa record awm tawh a thaichhe vek’ tiin an sawi a, July leh August-a a nih dan thin pangngai chawhrual pawh a khum bawk.
England-ah chuan Met Office-in June thla lum dan chawhrual chu 16.9°C a nih thu sawin June a lum ber tum a ni tih an sawi a, UK pum ang erawh chuan kum 1994-a chhinchhiah atangin a lum ber dawt a ni.
Portugal-ah pawh June thlaa lum ber ni thar tawngin 46.6°C a ni a. Thla khat chawhrual erawh an la tichhuak lo.
Turkey-ah ram kang avangin mi sang tel hmun himah suan chhuah an ni a, Italy-ah khaw lum lutuk kaihhnawihah mi pahnih an thi bawk.
July thlaa ni hmasa berah Aemet chuan Iberian peninsula-a hmun tam takah zan lam lum lam chu 43°C a ni a; mahse, Ningani atang hian a ziaawm hret rin a ni.
Thawhlehni zan khan Seville-ah chuan 28°C niin Barcelona-ah pawh 27°C a ni.
Thawhlehni tlai khan UK-a St James’s Park, London-ah chuan 34.7°C niin kumin a lum ber ni a ni.
Thawhtanni khan UK-a a lumna ber chu Heathrow Airport, London niin 33.1°C a ni a. Hetih lai hian Wimbledon-ah pawh 32.9°C a ni bawk.
Met Office chuan June thlaa UK lum lam chawhrual chu 15.2°C a ni a, June a lum ber dawttu a ni a. June, 2023 khan 15.8°C niin hei chiah hi a phak lo.
Turkey-ah chhanchhuah hna thawktute chuan mi 50,000 vel hmun himah suan a ni a, a tam ber hi khawthlang lama Izmir-a mite niin kang thelhtuten hmun za chuanga kang an la thelh zel.
Ram hi Bilecik, Hatay, Sakarya leh Manisa province-ah a kai tawh bawk.
Forestry Minister Ibrahim Yumakli chuan ni thum liam ta chhung khan ram pumah ram kang 263 a awm tawh thu a sawi.
France-ah chuan Thawhlehni pawh khan kua a la lum hle a, June thla liamah khan khawpui tam takin zan leh chhun lum ber tum an tawng nual tawh.
Paris Orly tumhmunah chuan 37.6°C a ni.
Paris-a Eiffel Tower chhim chu khaw lum lutuk avangin khar a ni a, Climate Minister Agnès Pannier-Runacher chuan ‘rinphak baka lum’ a nih thu a sawi.
Kum nga chhunga a vawi khat nan Paris region-ah khaw lum laka inralrinna sang ber, red alert an tichhuak a, region dang 15-ah tihchhuah a ni bawk.
France-ah hian sikul leh college 1,896 chawlh puan a ni.
Pathianni khan Lisbon khawchhak lam mel 60-a hla, Mora-ah chuan 46.6°C a ni a, Portugal-a a lum berna hmun a ni thar.
Italy-a Tuscany region-ah chuan khaw lum lutuk avanga damdawi ina enkawl ngai chu 20%-in an pung a. Khawpui 27 zinga 21 chu inralrinna sang ber hnuaiah a awm.
Lombardy-ah chuan chhun dar 12:30 leh tlai dar 04:00 inkarah in sak, kawng siam leh lova thawh chu September thleng khap a ni.
Italy lailia Florence-ah chuan Thawhlehni khan 38.9°C a ni a, chhim lama Cagliari-ah 38.6°C a ni bawk a. A la lum belh rin a ni bawk.
Greece-ah pawh ni eng emaw zat chu 40°C vel bawr a ni tawh a, Athens bul khuaah ram kangin in tam tak a chhia a, mi tam tak an insaseng.
Germany-ah chuan Thawhlehni leh Nilaini khan 38°C dawn a lai a, a lum ber record a thlen theih rin a ni.
Khaw lum hian Rhine River lui tikamin bungraw phur lawngte pawh tiam chin neia kaltir an ni.