St Peter’s Basilica-ah Pope zahna lantirtu an tam

St Peter’s Basilica-ah Pope zahna lantirtu an tam
Inrinnia vui tura Vatican-a a chenna atanga St Peter’s Basilica-a a kuang lak a nih hnuah mi tam takin Pope Francis-a thlah leh zahna an lantir.
Pope kuang inhawng hi Nilaini tuk khan hun urhsun hmanpui a nih hnuah St Peter’s Square kaltlangin lak chhuah a ni a, mi 20,000 vel an pungkhawm niin Vatican chuan a puang.
A kuangin square a paltlang lai hian dar tihruk a ni a, Italian tih dana mi zahna lantir nan mipuiin kut an beng bawk.
Pope hi pneumonia pahnih avanga chawlhkar nga damdawi in a awm hnua a chhuah hnu lawkah Thawhtanni khan kum 88 mi niin a thi a. Latin American zinga Catholic Church hruaitu ni hmasa ber hian kum 12 chhung a hna a chelh.
Nilaini khan red-robed cardinal leh white-clad priest rualten Pope kuang hi Casa Santa Marta khualbuka a chenna atangin St Peter’s-ah an la lut a, minute 40 tling lo hun an hmang.
Pope vengtu, Swiss Guard-ten a kuang hi biak in maicham thleng an zui a ni.
A ruang hi Zirtawpni tlai thleng biak inah hian dah a ni dawn a. Vantlangin Nilaini chawhma dar 11:00 atangin an hmu thei.
Hmuh theih hun hawn a niha hmuh tumin darkar riat chuang intlarte pawh an awm niin Italian chanchinbute chuan an tar lang a. Tlai lamah khan mi sang tel square-ah hian an intlar tawh.
Vatican pawhin Nilaini chawhnu khan biak in hawn hun tura an bituk, zanlai thleng an tih chu Pope zahna lantir duh an tam em avangin an pawt sei dawn tih an puang.
Biak in hi Nilaini leh Ninganiah zanlai thleng leh Zirtawpniah zan dar 07:00 thleng hawn tura tih a ni a, a kuang hi khar zui a ni ang.
St Peter’s chhungah erawh chuan zahna hlantute an lungchhe hle a. Thenkhat chu thingthia tawngtaiin kraws an siam a, muangchangin an che hlawm a. Mi sang tel awmna hmun ni mah se thawm pawh a zawi hle a ni.
Inrinnia a vui inkhawmah hian khawvel ram hruaitu lawk tak tak an tel dawn a. UK Prime Minister Sir Keir Starmer leh Prince William te pawh an tel ang.
Pope Francis-a hian a dam laiin a vuina inkhawm chu mawlmang taka ti turin a lo chah tawh a. A hmaa mite ang lo takin St Peter’s-ah pawh phum a ni dawn lo va, Rome lailia Virgin Mary-ah phum a ni ang a, a thlanlungah pawh a hming chiah ziah a ni ang.
St Peter’s-a a kuang lak a nih hma hian Pope Francis-a hi a ina a chapel-ah dah a ni a, Swiss Guard leh cardinal-ten tawngtai chungin an awmpui.
Tar lan tawh angin vantlang zinga a inlan hnuhnung ber chu Easter Sunday kha niin nawrlirh thutthlenga thu chungin thuchah a sawi.
A Papal apartment-te chu khawihnun hmanga khar vek a ni a, hei hi an kohhran tawngin Sede Vacante an ti a, luahtu awm rih loh (empty seat) tihna a ni a. Pope thar thlan hunah chauh hawn leh a ni ang.