State dang Kut chi thum hmang

Thawhlehni zan khan Raj Bhavan-ah larsap Dr Hari Babu Kambhampati huaihawtin Ugadi, Gudi Padwa leh Bihu Kut lawm a ni
Larsap chuan Ugadi chu Kut pawimawh tak, intuaithar lehna Kut a ni tih a sawi a. He Kut hi intuaithar lehna entirna a nih angin state hrang hrang – Andhra Pradesh, Telangana, Karnataka leh Maharashtra-ah chuan mahni in chei nan, kawr thar lei nan leh inhlan thar nan hman thin a ni tih a sawi.
He ni vek hian Maharashtra-ah chuan ‘Gudi Padwa’ Marathi kumthar lawmnan hun hman thin a ni tih sawiin, chutiang bawkin Assam-ah chuan Bohag Bihu, an kumthar bul tanna kut entirna chu April 14 hian lawm a ni dawn tih a sawi a ni.
Heng kutpui lawmna hun hman a ni hian India ram chu ‘lo leh thlai’ Kut chi hrang hrang ropui tak takah a hausak zia pholanna a nih thu Dr Hari Babu Kambhampati hian sawiin, Kut lar zual – Punjab, Haryana leh Himachal Pradesh-a lawm thin Baisakhi Kut; Karnataka-a lawm Mesadi Kut; Odisha-a lawm Panan Sankranti leh Kerala leh Tamil Nadu a lawm thin Vishu a awm tih a sawi a ni.
Heng Kutpui hmante hi hnam hrang hrang, ram hrang hrang atanga rawn kalte intawhkhawmna leh mahni hnam ziarang mawi tak tak pholanna hmun a ni chu he hun ropuina belhchhahtu a ni tih sawiin, “State hran, hnam hran, sakhuana hran leh tawng hran theuh nei ni mah ila, kan zavaiin India khua leh tui, ram inpumkhat kan nihna rawn tarlang chiangtu pawimawh tak a ni,” a ti.
Raj Bhavan-a Kut hrang hrang hmannaah hian lam chi hrang hrang – Kuchipudi lam, Telugu fusion lam, Bihu lam, Bodo lam, Assamese lam, Marathi fusion lam, Bharatnatyam lam, Bhangra lam leh Punjabi lam chu PUC, MZU leh RIPANS zirlaite hnen atanga entir niin, heng bakah hian medley lam, Bollywood zai, Tollywood lam leh Tlang lam chu MZU leh Hrangbana College zirlaiten an entir bawk.
NABARD Mizoram general manager Prasad Rao chuan Udagi chungchang a sawi a. MZU asst. professor Dr Kiran Kharat chuan Gudi Padwa chungchang a sawi a ni.