State Day of Prayer

State Day of Prayer Committee chuan Mizoram State Day – February 20 denchhenin February 16-20 chhung hian ram tana tawngtai a rel a; Mizoram hmun hrang hrang bakah state pawn lam thlenga neih tura ruahman a ni.
Hei hi party leh sawrkar hmalakna ni loin, kohhran hrang hrang intelkhawm hmalakna a ni tih a huaihawttute chuan an sawi a. Hei hian a tum ber chu, Zoram mipui a ruala thinlung hmunkhat pua ram tana tawngtai a thatna leh hlutna hriat tlan a tul tih hriat tha an tih vang a ni, an ti bawk.
|awngtai huaihawttuten chawngheia tawngtai rual an huaihawt chhan chu eng pawh ni se, Kristiante innghahna bulpui ber chu tawngtai a nih miau avangin leh, kan rin ber Pathian pawhin tawngtaia ‘dil’ tura min tih miau avangin tawngtai hi chu a pawimawh hle tih chu kan hre theuh awm e.
|awngtai kan uar em avang hian hnamdangte hian ‘tawngtai hnam’ tiin min sawi hial pawh ni se, a mawh hran awm lo asin! Mahse, chuti chung chuan ram inrelbawlna te, kan inthenawm dan te, sum kan dawn dan te, leh thildang tam tak pawh, hetianga kan khawsak dan tlangpui han thlir hi chuan, tawngtai tam lo ‘zia’ niawm tak kan ni!
Ram rorelna fawng chelhtute, sawrkar hnathawkte, sumdawngte, NGO hrang hrang hruaitute, khawtlang hruaitute, hruaitu ni ve lem lote pawh, ni tin, zan tin, khawi ilo function-na apiangah, inneihnaah, sumdawnna hmunah, project thar hawnnaah etc. kan tawngtai zel. Inkhawm kan taima em em a; chu chu Pathian biakna hmuna kal a ni. A chunga kan sawi hruaitute zawng zawng khi kohhran mi, tawngtai mi vek an ni. Chuti chung chuan dik lo hi a tam em em reng si! Dik lote hi tawngtai ve ngai lo nia kan ngaih drug addict etc. rawn thlentir a ni der si lo!
Dik lo a tam chuan, kan tih dan a dik lo tihna a ni ber awm e. Kan tawngtai nasa, mahse kan tawngtai dan a lo dik lo a ni mai ang em? Tui umah hian kan tui in tur kan chhun khah dawn chuan kan tiruak vek phawt a, fai takin kan silfai phawt a, a fai loh chuan kan pum te a nat phah thei a, kan damloh phah thei a ni tih kan hre thin. |awngtai pawh hi chutiang deuh chu a nih hmel a; kan thinlung luahtu bawlhhlawhte kan thuahfai phawt loh chuan kan biak Pathian hian a rawn luah duh a rinawm loh. Kan tawngtai hian kan biak Pathian address mang lo hian, kan bula kan tawngtai ri hre pha chinte hriat atan lek hian kan lo au vak vak thin te hi a ni thei mai ang em?
Thlarau Thianghlim luah tlaka mahni inphawrh ruak fai tha mang lo chunga Siamtu hi kan dawr fo a nih chuan, Pathian luh theih lohna thinlung putu rual kalkhawm kan ni mai dawn tihna a ni.