State pawna captain leh vice captain ni pha Mizote
Kan thupui hi state pawna captain leh vice captain ni pha Mizote tih a ni a, tlemin han sawifiah hmasa ta lawk ila.
Mizote hi hnamdangte ang bawkin kan pi leh pute hun lai ata tawh infiam ngaina hnam kan ni ve a, hnamdangte nena kan inchiahpiah hma, keimahni hlanga kan khawsak lai atangin infiamna chi hrang hrang kan lo nei ve tawh thin.
Naupang infiamna a awm a, chutah pawh mipa naupang leh hmeichhe naupang infiamna a awmhrang a, thalaite infiamna a awm leh a.
Hun a inher zel a, zirna avang te, khawsakna avang te, sipai leh police tan avangtein Mizoram pawn, India ram hmun hrang hrang leh kan chhehvel hnai foreign ram thlengin kan inzarpharh ve ta zel a, chu’ng kan awmna hmun hrang hrangah pawh chuan infiamna kan thlahthlam lo tlangpui a, Mizote chu infiamna lamah a rualpawl tawk kan ni tlangpui thei zel a, hnamdang leh ramdang daihah pawh a thiam pawl leh langsar pawl sawi tur leh hriat tur an awm fer fur bawk a ni.
Tuna kan thupuiah hian state pawna captain leh vice captain ni pha Mizote tih a ni a, state pawn tih hian foreign thlengin kan huamtir dawn a ni.
Tuntuma India ram state dang leh foreign thlenga Mizo infiammi, an telna pawla a langsar leh thei fal ni pha, team leader hial han ni thei kan lawrkhawm turte hi Mizoram sawrkar Sports & Youth Services department-a director ni thin, Mizoram sports kaihhruaina kawnga mi pawimawh leh langsar ni reng tawh tur Zoliana Royte (L) lehkhabu ziah ‘Mizoram sports chanchin’ tih behchhana buatsaih a ni.
He lehkhabu hi kum 2008-a tihchhuah, phek 759-a chhah niin, Mizoram sports chhuitu leh zirchiangtu, hrechiang leh belchiang duhte tana tana lehkhabu ro tling a ni.
Zoliana Royte hian a lehkhabu phek 747-na bung 24-naah ‘Hriat ve atan’ tih thupui dahin, a hnuaiah thupui te zawk ‘State pawna captain leh vice captain ni pha Mizo tlangvalte’ tih a dah leh a, chutah chuan India ram state hrang hrang leh ram pawn thlenga Mizo infiammi thei fal, an telna pawla captain leh vice captain hial han ni pha, hnamdangte pawhin an chungen tling, team chhungah pawh hruaitu ena an en leh hruaitu hna thawk thei khawpa infiam thei leh leadership nihna nei mi 23 hming a tlarchhuak a, hei lo pawh hi a hriat hmaih sawi tur an la awm mai thei.
Zoliana hian a hriat hlat ber chu DK Dawnga niiin, kum 1921 daih tawh khan DK Dawnga hian Allahabad khawpuia Jamna High School hockey team captain nihna a lo chelh tawh a ni.
Midang kan la tarlan lehzel turte pawh hi kum tam tak kaltaa mite an ni hlawm a; tute nge an nih chiah tih leh tute nge an chhungte ni a, khawi khua leh tuite nge an nih tih pawh hriat harsa tak tak, an la dam nge an thi tawh tih pawh hriat hleih theih lohte an nih hlawm avangin an chanchin hi chipchiara hriat a harsa deuh tawh niin a lang.
Tin, thenkhat hi chu a hranpa liau liaua infiamna lam luhchilh pawh ni chiah lo, tunlaia professional athlete kan tih ang tur ni lote ni hlawmin an lang a; an lehkha zir laia an zirna behchhan team dina tel, an theihna leh thiamna avanga team hruaitu nihna han chelh chho ta, an zirlai an zawh hnu emaw Mizorama an lokir hnua infiamna lam luhchilh zui zel ta lo, a hnua officer lian leh Mizorama mi langsar tak tak ni chho tate an awm bawk.
A then chu sipai leh police team-a tel, hotute thu anga game luhchilhte an ni hlawm bawk a; chu’ng mite pawh chu infiamna lam thlurah thuk taka chanchin sawi tur nei zui lem lote pawh ni hlawmin an lang.
|henkhat erawh an awmna ram team tana international tournament khel pha, Asia khawmualpui huap leh Olympic thlenga ram aiawh pha an awm bawk a, chu’ng zinga kan hriat zui tak ber Zomuana Ralte chanchin chu tlemin kan han thlurbing deuh dawn a ni.
Aw le, tunah chuan Mizote zinga state pawna captain leh vice captain ni pha kan hriat phak chinte chu an khelhna leh team-a an nihna nen han tarlang zawi zawi ila:-
DK Dawnga
Kum 1921 khan Allahabad khawpuia Jamna High School hockey team captain a ni.
S. Lalnghinga
Kum 1938 atanga 1940 inkar chhung khan Govt High School, Shillong bakah Engineering College, Dhaka leh Mawkhar Area Hockey Team, Shillong-ah captain a ni.
Biakkunga Murray
Kum 1947 khan St. Edmunds College, Shillong Hockey Team-ah captain a ni.
Aithuama
Kum 1955 atanga 1966 chhungin Assam Police Hockey Team captain hna a chelh.
P. Rohmingthanga
Kum 1957-ah St. Xavier College, Calcutta-ah captain a ni.
Er. K. Thangzuala
Kum 1957 vek khan Assam Engineering College, Guwahati captain mawhphurhna a chelh.
Lalengruali
Ani hi tuntuma hmeichhe infiammi thei fal kan tarlan theih awmchhun niin, kum 1961 khan St. Mary High School, Shillong-ah Throw Ball leh Basketball team captain a ni pha.
KM Biaksailova
Kum 1961-63 chhungin St. Edmunds College, Shillong Hockey Team-ah captain a ni.
Darchhawna
Kum 1962-ah Assam State Hockey Team captain ni phain, kum 1971 atanga 1973 chhung khan New South Wales Theological College, Australia-ah captain a ni leh bawk.
H. Ralliana
Kum 1965-ah Assam State Hockey Team vice captain mawhphurhna a chelh.
Thangpara
Mizoram buai hma hret leh buai tirh kum 1965-66 chhung khan Madras University Hockey Team leh Madras Christian College Hockey Team-ah vice captain nihna a chelh kawp.
R. Pazawna
Ani hi Assam Police niin, kum 1966 atanga kum 1984 chhung khan Assam Police Hockey Team captain a ni ngar ngar a; Kum 1970 atanga kum 1984 chhungin Assam State Hockey Team captain a hna a chelh tel bawk.
F. Lalruata
Ani pawh hi Assam Police bawk niin, kum 1968 atanga 70 chhungin Assam State Hockey Team vice captain a ni.
Lalpuithanga
Assam Police tho niin, kum 1972 khan Assam State Hockey Team-ah vice captain mawhphurhna chelhtir a ni.
Raldothuama
Kum 1969-ah Madras Christian College Football Team captain a ni.
Rochhuma
Assam Police tang niin, kum 1971-ah Assam State Hockey Team vice captain hna thawkin, kum 1976-ah Assam State Hockey Team captain-a hlankai a ni.
Zothangvunga
Assam Police tho niin, kum 1979-ah Assam State Hockey Team vice captain a ni.
R. Vanlalruata
Ani pawh Assam Police ni chungin kum 1979-ah Assam State Hockey Team captain a ni.
Thanglura
Bangladesh lama Mizo tlathla zinga mi niin, kum 1965 khan Bangladesh Police Team captain ni pha ngat a ni.
R. Zoduhawma
Ani pawh Bangladesh lama hming chher niin, kum 1963 daih tawh khan Provincial Hockey Tournament-ah Bangladesh National School Team captain a lo ni vang tawh.
Zomuana Ralte
Mizo chhulchhuak zinga Olympic-a inlan thei tlemte zinga pakhat niin, Bangladesh-ah chuan a vanglaia hockey player lar berte zinga mi a ni a, a chanchin kan la thlurbing deuh dawn chungin captain a nihna tournament lian thenkhat tarlang ila.
Bangladesh Hockey Team tan kum 1986 Seoul khawpuia Asian Games vawikuanaah khan captain niin, kum 1988 Seoul khawpui veka Olympic Games-ah captain a ni a; kum 1989 Delhi khawpuia Asian Cup Tournament-ah Bangladesh captain niin a inlan leh a; khami kum vek Japan khawpui pakhat Hiroshima-a Youth Qualifying Round-ah Bangladesh captain a ni leh bawk.
Lalramthanga
Bangladesh rama Mizo nih tinuamtu dang niin, kum 1985 khan Dhaka khawpuia Asian Cup-ah Bangladesh vice captain niin, kum 1978 khan Mohamedan Team captain a ni bawk.
R. Buanthanga
Ani zet hi chuan talent a nei tha nangiang mai a, hockey, cricket leh football-ah hming chher vekin, kum 1962, ‘63, ‘64 chhung khan King George’s School Combine Hockey Team captain niin, kum 1964, ‘65, ‘66 chhungin he school cricket team captain a ni leh a; kum 1970-ah chuan St. Anthony’s College Football Team tan captain a ni ta thung.
Tarlan tak ang khan Zoliana Royte zara kan han thurchhuah theihte hi thuk zawka an chanchin chhui harsa fu fute an ni tawh hlawm a, an hun laia record mumal tak ziaka dah lohte a nih bawk avangin a tam zawk hi chhui ngaihna vang tak an ni hlawm.
Chhunzawm tur…
P. Rohmingthanga hi Mizo IAS officer chhuanawm tak niin, a pension hnuah pawh tangkai takin ram tan hna a thawk zui zel a, tunah chuan INTACH Mizoram Chapter convener a nihna hi mite hriathlawhna pakhat a ni.
Er. K. Thangzuala hi Mizoram PWD Engineer-in-Chief leh Secretary hna lo chelh tawh a ni a, ziaka kan hmuh theih chinah a pension hnuah politik luhchilhin, kum 1998-2003 chhung khan MPC leh MNF tangkawp puihnain MLA atan thlantlin a ni a, Mizoram politician hlunberte zinga mi Lal Thanhawla khingthla theitu mi tlemte zinga pakhat a ni.
-- Advertisement --
Zomuana Ralte (Jumman Lusai)
Mizo chhulchhuak zinga hockey khel thiam hmingthang hmasaber, Mizo hockey star ropui Zomuana Ralte chanchin hi han chhui zau hlek dawn ila.
Amah hi pa thawm zawi leh mahni inthehlar lam ti mi lo tak a nih avang leh Bangladesh rama a vul lai hi a rei deuh hlek tawh avangin Mizoramah hriat a hlawh lutuk lo a, a upat lamah Mizoram lamahte lo chuangchhuak mah se hockey fans leh media ngaihven pawh a hlawh lutuk lo niin a lang a, mahse, kum 2015 January ni 18-a Bangladesh khawpui Dhaka-a a thih meuh kha chuan Mizoram lamah pawh a chanchinin ngaihven a hlawh a, media lam pawhin an tarlang ve ta hial a ni.
Bangladesh tana hockey khel thiam hmingthang hi Bangladesh lamah chuan ‘Jumman Lusai’ (Zomuana Lusei) tiin an ko mai thin a, World Hockey XI zinga tel pha tawh ngat a ni.
Zomuana hi Bangladesh rama hockey player ropui ber ang hiala ngaih a nih avangin a thih thu pawh Bangladesh-ah chuan news lian tak a tling a, Dhaka khawpui atanga tihchhuah The Daily Observer ePaper-ah chuan ‘Hockey legend Jumman Lusai no more’ tiin thupuiah an dah kulh a; he khawpui atanga tihchhuah saptawng chanchinbu dang The New Nation ePaper lamah pawh kum 2015, January ni 19 khan ‘Hockey star Jumman Lusai no more’ tiin thupui vuaha Mizo pa thih thu hi uar taka an ziak chhiar tur a awm.
The Daily Observer chuan ‘Legendary National Hockey idol Jumman Lusai’ tiin bul an tan a, Bangabandhu Sheikh Mujib Medical University (BSMMU) Hospital-a life support hmanga enkawl a nih laiin kum 59 mi nia mual a liam thu an tarlang.
An ziah zel danin, Zomuana hi pneumonia leh BP sangin a tibuai chho ve reng a, a thihpui tak ber erawh thluak lam natna ‘brain haemorrhage’ niin, a ruang hi Syhlet-a a unaupa Zobela (Jubel Lusai) chuan a la a, tah chuan vuiliam a ni.
Kum 1980 bawr chho kha a vanglai niin, khatih hun laia Bangladeshi hockey player zinga World Hockey Eleven-a lang pha awmchhun a ni nghe nghe.
Full-back ni thin Zomuana hian kum 1978 khan Bangladesh Police behchhanin a first division hockey career bul a tan a, kum 1979-ah Abahani Limited lamah insawnin, kum 1993-a hockey khelh a bansan thleng khan he team tan hian a khel a ni.
Inkhelh a bansan hnuah pawh Abahani team hian coach-cum-manager atan kum engemawzat chhung an chhawr zui nghe nghe.
He legendary hockey star hian New Delhi-a IX Asian Games an nghah tum khan Bangladesh tan a inlan tan a; kum 1986 a herchhuah chuan Dhaka khawpuia 2nd Asian Cup Hockey tournament khelh tumin Iran lakah hat-trick a siam a, Bangladesh tana international hat-trick a siam vawikhatna a ni.
Kha match-ah khan a goal thum vuakluh hmangin Iran lakah Bangladesh chuan 3-0 hnehna an chang zui ta nghe nghe a ni.
Tarlan tak angin, amah hi full back-a khel thin ni mah se goal thun thei tak a ni a, hei hian Bengali mipui zingah a hming a titha lehzual a ni.
A thih hian Bangladesh Hockey Federation, Bangladesh Olympic Association, Bangladesh Sports Journalists Association, Bangladesh Sports Press Association, Abahani Limited, Mohammedan Sporting Club, Usha Krira Chakra, Mariners Youngs club leh infiamna pawl tamtak bakah he rama mi challang ber berte’n an ui thu an tarlang hlawm a, chu’ng zingah chuan Bangladesh State Minister for Youth and Sports Biren Sikder pawh telin, Bangladesh ram TV leh chanchinbu lamah pawh a thih thu leh a chanchin hian hmun a luah tam hle a ni.
Samson Ramengmawia
India hmarchhak football club zinga Indian top flight ni thin I-League khel thei hmasaber Shillong Lajong captain ni pha Mizo tlangval Samson Ramengmawia chanchin hi han chhui leh thuak thuak ila.
Aizawl tlangval Samsona hi kum 1985 July ni 28-a piang niin, feet 5 leh inchi 6 leh a chanve leka sang, midfielder thin a ni a; Mizoram pawnah chuan hmarchhak team tha Lajong leh Kolkata club hlun Mohammedan SC thuam a inbel tawh a, khelmual chhungah jersey number 20 a ha thin.
Kum 2007 atanga 2013 chhung khan Shillong Lajong tan game 43 khelin goal hnih a khung a; kum 2013-ah Shillong atangin Kolkata lamah chona thar hmachhawn turin a chhuak ta a ni.
Samson-a hi player discipline tha tak a ni a, a discipline that leh leadership quality neih that vangin a team telna tawhah chuan captain a ni thei deuh zel a, player naupang zawkte tana entawntlak tak a ni bawk.
Durand Cup 2011 semi-final pakhat zawka Churchill Brothers nen Delhi-a an inkhelh tumin a ngalruh te zawk (fibula) a titliak a, Delhi-ah zai nghal niin, kha kha a career-a hliampui a tawrh langsar a ni.
2010-11 season khan a captain-na hnuaiah Shillong Lajong chu I-Leauge 2nd Division champion a nihpui a, mahse, Durand Cup-a a hliam vang khan 2011-12 I-League a khel thei ta lo a, a I-league khel hman lo chiah chiaha hliam a tuar kha hrehawm a tih thu a sawi fo thin.
Aizawl Sipai Lammuala kum 2011 Independence Day lawmna fotball tournament-ah khan a captain-na hnuaiah Shillong Lajong FC an rawn champion a; Meghalaya club ve bawk Royal Wahingdoh FC nen final-ah intumin, Mizo player tamna Lajong chu sili faiin an chak a ni.
Shillong Lajong hi Mizo footballer-te chherliantu an ni a, Lammuala nomawi an rawn chawi tum khan final-ah Mizo paruk inlanin, chu’ngte chu keeper Lalthuammawia, defender pahnih Zohmingliana Ralte leh Lawmzuala Chhakchhuak, midfielder pahnih Samson Ramengmawia leh Lalramluaha bakah forward PC Lalhlimtharate an ni a, inkhel bultantu zingah an tel pha vek nghe nghe a ni.
Khatih lai khan Lajong squad-ah Racy K. Lalremmawia leh Lalchhuanmawia Fanai an la awm cheu bawk a, khatih laia Meghalaya club-a Mizo awmte kha an vaiin team tana player pawimawh vek an ni a, an chhiat loh piahlamah captain Samson Ramengmawia huhang leh uapna pawh an chhawr tel ve bawkin a rinawm
Samsona chuan khami tuma trophy an hawn kha a team-mate hnamdangte pawhin an ngaihhlut thu sawi chungin hnamdang chang ni lo team chhunga Mizote ngei pawhin an ngaihlu tih a sawi a, a captain-na hnuaia champion an nih miau avangin amah pawhin a ngaihlu hle tih a sawilang tel.
Jeje Lalpekhlua
Kum 2016 March thla tawp lam khan India national football team chu Russia-in a thlen tur kum 2018 world cup khel tur zawnna preliminary joint qualification round 2 hmachhawn turin Iran ramah an thlawklut a, March ni 24-a mualneitu Iran hmachhawn tur niin, March ni 29-ah Turkmenistan an su zui leh a; he match pahnih an khelh hma ni March ni 23 khan khatih laia India head coach Stephen Constantine khan Mizo striker Jeje Lalpekhlua chu India captain atan a ruat a, Hnahthial tlangval hi Mizo footballer zinga India captain ni thei hmasa ber a ni zui ta nghe nghe a ni.
Top flight club captain nih pawh a ropui a, mi nazawng nih theih loh a ni a, ram khat captain nih phei chuan inchhuan larhna tham tling a ni.
Khatih lai kha Mohun Bagan tana a khelh lai niin, a hma kum chiah season-ah khan Kolkata club chu India rama football trophy lian zawng zawng a lakpui a, national team captain atana ruat a ni pawh kha a phu hle niin a lang.
Chennaiyin FC striker ni thin, tuna MLA ni ta Jeje hi tunah kum 29 mi niin, feet 5 leh inchi 8-a sang a ni a; a khelhna team lamah jersey number 12 a ha thin a; kum 2011 atang khan India senior team tan inlan tan.
Indian Super League khelh tan a nih atang khan he league-a Indian player goal khung hnember dawttu niin, Chennaiyin tana goal tilut hnember a ni tawh bawk.
Kum 2015 khan Mohun Bagan chu I-league title lakpuiin, Indian Super League lamah Chennaiyin a champion-pui bawk a, a khelhna team pahnih tana a chetthat em avangin FPAI Football Player of the Year atan an thlang nghe nghe.
Youth level-a a bultanna chu Pune FC niin, kum 2007 atanga 2008 chhung khan Pune youth team tan a khel a; kum 2008 atanga 2013 chhung khan Pune senior team tan game 54-ah goal 16 thunin, Pailan Arrows-ah loan-in a kal a, chuta tangin Mohun Bagan leh Chennaiyin-ah a insawn leh ta a ni.
National team lamah chuan kum 2008-2009 khan India U19 team tan game hnih khelin goal a khung zo lo a; 2010-2011 chhungin India U23 team tan match 13-ah goal ruk a tilut a; kum 2011 atangin senior India national football team hmatawng pawimawh a ni chho ta a ni.