State pumah faina beihpui thlak dawn

Ministry of Housing & Urban Affairs leh Department of Drinking Water & Sanitation hmalaknaa buatsaih ‘Swachhata Hi Seva 2024’ hman dan turah Thawhlehni khan State Steering Committee chu chief secretary Dr Renu Sharma kaihhruaiin thutkhawm a ni.
UD&PA leh PHED chu nodal department an ni a, department – Health, GAD, LAD, School Education, H&TE leh I&PR aiawh chu member an ni.
Swachhata Hi Seva campaign hi kum 2017 atanga hman tan a ni a, kumin hian September 14 atanga October 2 chhung hman tur a ni. Kumtin thupui bik neia hman thin niin, kumin thupui chu ‘Swabhav Swachhata – Sanskaar Swachhata’ a ni. Mizoram hmun hrang hrangah faina beihpui thlak tur a ni, district hrang hrangah bawrhsap kaihhruaia neih a ni ang.
Swachhata Hi Seva 2024 hnuaiah hian kawng hrang hrangin faina beihpui thlak a ni dawn a, hmun bawlhhlawh leh bal zual (black spots) ngaipawimawh bik thenfai hnatlang neih tur a ni. Sanitation worker-te hnathawh hriatpui leh chawimawi a, faina beihpui thlaka hmalak tawhna zawng zawng chu he hunah hian lawm tum a ni. Kumin hi Swachh Bharat Mission-in kum 10 a tlin kum a ni bawk.