State Univ neih tum dawn CSS hnuaia mi dahngheh rel

Mizoramin ama puala state university a neih theihna’n sawrkar chuan hma a la dawn a. Central sponsored scheme hnuaia Mizoram sawrkara thawkte dah ngheh theih dan tur pawh rel nia sawi a ni.
Thawhtannia chief minister Zoramthanga hoa Council of Minister thukhawm chuan ‘New Education Policy 2020-in a duh dan angin, state university neih ve theihna tura hma lak nise,’ a ti.
An thurel pawm tak zingah, DP & AR rawtna – Mizoram sawrkar hnuaia thawktu tur lakah Mizo tawng thiam dan chin enchhinnaa personal interview chauha teh thin chu written exam-a an thiam dan atanga tehna lak tawh nise, tih chu pawm a ni.
Mizoram sawrkar hnuaia thawk doctor hamthatna tur duana rawtna chu pawm a ni a. Health & Family Welfare hnuaia thawktute leh a kaihhnawiha rawtna siam leh hmasawnna tur ruahman thar thenkhat pawm a ni bawk.
Hei bakah hian Goods & Services Tax (Amendment) Bills, Aizawl Municipal Corporation leh municipalities leh, Mizoram Rights of Children to Free & Compulsory Education Rules 2011 hnuaia dan siamthat te pawh pawm zingah a tel a ni.
Sawrkar thuchhuaka lang tel lo, All Mizoram CSS Employees Coordination Committee-in sawrkar laka a phut mek – an tana regularisation / absorption scheme siam, sawrkar hna ngheta lakah CSS hnuaia thawkte tan hauh neih leh, CSS hnuaia thawkte tan recruitment rules siam chu Council of Minister thukhawm hian a rel tel nia thu dawn a ni a. Sawrkara an lo ngen tawh leh chief minister-in kumin July ralhmaa ngaihtuah a lo tiam tawh angin, special scheme siamsak a, a tahtawlah a ngheta dahluh theih dan ngaihtuah chu an pawm tih thu dawn a ni.