Sub Station dahna tur enfiah

South Tuipui bialtu MLA Jeje Lalpekhlua chuan Inrinni khan Power & Electricity department-in Hnahthiala 132kV Sub Station an dahna hmun tur a enfiah a, P&E thawktute, khawtlang hruaitu thenkhat leh Hnahthial Thalai Pawl hruaituten an tawiawm.
Sub Station bunna tur hi Mauthimpui hmunah niin a ram hi Thiltlang ram a ni a; P&E department-in land lease nei tawh mah se, Forest department lamin teak plantation an neihna hmun a nih avangin kut an thlak lawk thei loa, bialtu MLA hian Forest minister hmu in hma lak tan a ni theih thu Forest minister hian a lo hrilh a, a hmunah enfiah a duh avanga enfiah a ni tih sawiin, P&E pawh hna tan nghal turin a chah a ni.
Hnahthiala 132kV Sub Station din turah hian Haulawng lam atangin tower banin electric power lakluh a ni dawn a, kum hnih chhunga siam tur niin, siam zawh a nih hunah chuan Hnahthial Sub Division-in a chawm khaw hrang hrangten power supply dawng tha thei zawk tura beisei a ni.