Sum enkawl thiam lovah sorkar puh

Aizawl West I-a ZPM candidate TBC Lalvenchhunga’n Ningani khan thuthar lakhawmtute a kawm a, Mizoram sorkar chu sum enkawl thiam lovah a puh.
“Mizoram sorkar hian sum enkawl a thiam loh em avangin leh sum enkawlna kawnga a hlawhchham chian em avangin a pung awma rulh leh turin sum kan puk nasa hle a,” a ti a, “Covid harsatna kan tawh lai pawhin Kamrul-a bill a tang lo a, Abu Mazumdar-a buhfai supply to bik pawh bill a tang ngai hek lo. Chutih rualin mipui healthcare bill leh SEDP erawh pe thei lo sorkar kum 5 kan lo hrawn ta a. Mipuite hian finance minister thiam lo ber leh kai peng thiam ber hi vote kan ba lo a ni tih kan puang duh a ni,” a ti.
SASCI chungchang a sawi a, grant ni lovin loan a ni a ti a, state thenkhat chuan leiba an ngah avangin an la duh lo nia sawiin, Mizoramah chuan party mite induhsak nan leh campaign nan kan hmang, a ti a, Mizoram sorkarin cheng vaibelchhe 993.1976 zet a puk tawh niin a sawi.
“SASCI hmanga an sum puk hmanga hnathawh tur te hi restricted tender hmang deuh veka pek a ni a. Hna hmanhmawhthlak leh a bika thawh ngai, Restricted Tender hmang meuha pek ni si, vawiin thlengin hnathawh mumal hmuh tur a la awm lo a, zawh hun tura tih chu sawi loh, hna bul tan loh pawh tam tak a la awm a ni,” a ti.
Covid hi chhuanlama hman chi a ni tawh lo tiin a sawi a, 2021-22 thleng khan min nghawng nia sawiin, “Mizoram sorkar hian covid avanga sum dawn kim loh cheng vaibelchhe 2636.52 kan nei tiin chhuanlam siamin sawi lan tehah an nei \hin a. Kum 2019-20 a\anga 2022-23 thlenga kan budget hmuh tur beisei aia tam kan hmuh belh hi vaibelchhe 2563.17 a ni tih hi mipui ten hria ila,” a ti.