Sunshine Double beisei Alcaraz
US tennis behchhana mite ngaihsan pakhat chu US Open khelh hmaa tournament lian pahnih Indian Wells leh Miami Open-a champion zawn hi a ni a, chutiang ti theite chu ‘Sunshine Double’ tiin an sawi a, he tournament-a champion kawp hi thil har tak a nih avangin player 11 chiahin Sunshine Double nihna hi an la chang thei a, tunah Indian Wells champion Carlos Alcaraz chuan a beisei ve leh mek.
Thawhlehni khan Spaniard hian 6-3, 6-3-a Lorenzo Musetti sawp chungin Miami Open quarter-final a lut a, a zawna he stage kum thum a thlenna niin, 11th seed Grigor Dimitrov nen semi-final luh an inchuh ang.
Bulgarian Dimitrov hian a career-ah harhtharna chang mekin, Miami Open last eight a luhna kawngah 3-6, 6-3, 7-6(3)-in Poland player Hubert Hurkacz a hneh
Ti chuan, Alcaraz lam hawi chhunzawm leh ila, Spaniard hian Italian 23rd seed Musetti hneh turin minute 90 pawh hun a hmang tling lo a, kum 2022-a a lo champion tawhna chhunzawm turin quarter-final a lut leh ta phawt.
A career-a a title hum hmasakber tur beisei ve mek Daniil Medvedev pawhin Germany player Dominik Koepfer laka 7-6(5) 6-0 hnehna changin quarter-final a lut a, Russian third seed hian Chilean 22nd seed Nicolas Jarry a tum leh ang. Jarry hian last eight lut turin seventh seed Casper Ruud of Norway lakah 7-6(3), 6-3 hnehna a sualchhuak.
Unseeded Czech Tomas Machac pawhin Italy player Matteo Arnaldi lakah 6-3, 6-3 hnehna a sualchhuak a, a vawikhatna atan Masters 1000 quarter-final a lut ve ta nge nge.
Machac hian fiahna hautak zawk a hmachhawn dawn a, 6-4, 6-3-a hnehna chang second seed Jannik Sinner a tum leh ang.
Hmeichhe singles lamah Elena Rybakina chuan Thawhlehni khan Miami Open quarter-final hautak zetah 7-5, 6-7(4), 6-4-in Maria Sakkari a hneh hram a, Wimbledon champion hlui hian a zawna a vawihnihna atan ‘last four’ a lut.
Final luh inchuh pakhat zawka kum 34 mi Victoria Azarenka hmachhawn tur Kazakh Rybakina chuan inkhelh banah a chauh thu leh tawng pawh a peih chiah loh thu sawi chungin inbeihna hautak a nih thu leh ball thar hman a ni kha a vanneihna hriltu pakhat a nih ve pah thu a sawi a, tun dinhmunah a taksain ngai awh leh turin hahchawlh vang vang bak mamawh dang a nei lo tih a tarlang tel.
World number four leh 2022 Wimbledon champion ni bawk Rybakina hian he tournament-a vawithum champion tawh leh world number one hlui ni bawk Azarenka a tum leh dawn a; veteran Belarusian player hian quarter-final match pakhatah 7-6(4) 1-6 6-3-in Yulia Putintseva a paltlang ve bawk.