Suu Kyi fapain a nu a ngaihven tak zet ti

Myanmar leader lung ina khung mek Aung San Suu Kyi fapa naupang zawk chuan a nu kum 78 a upa ni tawh hirselna chungchangah an ngaih a tha lo takzet tiin a sawi.
“A tha a ni tih hriat mai tal ka duh ngawih ngawih a ni, tun dinhmunah chuan a legal spunsel pawh a be thei lo a ni” tiin Kim Aris chuan a sawi a.
“A doctor pawh a rawn thei lo va, tuma hmuh an phal lo va, lung in tang dangte nena an inbiak pawh phala ni lo va, solitary confinement anga dahin a awm mek a ni,” tiin Aris chuan a sawi bawk.
Suu Kyi hi kum 2021 khan Army tena a sorkar paihthlain an man zui a ni a. Chumi hnuah thubuai siamsaka thiam loh chantir nghalin kum 27 lung in tang tura tiha tantirin a awm mek a ni.
Army tena thuneihna an chan chu duh lovin Myanmar ram chhung hmun tam takah dodalna kalpui niin civil war rawng tak chhuak zui avangin mi sang chuangin nunna an chan phah tawh bawk.
Kum 46-a upa Aris chuan kum sawm tam tak politics thilah pawh inhnamhnawih duh miah lova a awm tawh thu sawiin ‘chhungkaw nun pangngai ka neih theih nan engmah pawh ti duh lovin ka awm a ni’ a ti a.
“Media-te hnenah engmah ka sawi duh lo va, social media tak nigal pawh ka hmang duh lo. Mahse, tun dinhmuna Burma-a thil thleng hi chuan min ti mangang takzet a ni,” tiin Myanmar tia sawi duh lovin Burma a ti zui a. “Ka nu nena kum hnih leh a chanve chuang inbe pawp thei miah lova min siam hi ka tawngchhuah chhan pakhat a ni,” tiin a sawi zui bawk.
“Tunah chuan a dinhmun dik tak khawvelin a hriat theih nan ka tawngchhuak ta a ni,” tiin a sawi bawk a. Social media hmang tanin nasa zawka hmalak a tum thu a sawi bawk a. Aris chuan a nu chu a damsam lo reng tia sawiin a ka chhunglamah harsatna a neih avangin thil pawh a ei tha thei lo a ti bawk.
Britain’s Foreign Office leh International Red Cross te chuan theihtawp chhuaha a ngenna avanga a nu chanchin hriat an tum pawh an hlawhchham tiin Aris chuan a sawi bawk a. Myanmar sipai sorkar te pawh biak pawh tuma theih tawpa hma a lak zui thu a sawi zui bawk a ni.