Taekwondo National referee seminar zo

Taekwondo National referee seminar zo
Ni thum awh National Taekwondo Referee Seminar leh National Taekwondo Referee Refresher Course ni bawk chu karliamta Zirtawpni khan MATA Hall, Republic Vengthlangah zawh fel niin, kharna hun hi Champhai South Bialtu MLA Lt. Col. Clement Lalhmingthanga’n a hmanpui.
National Referee Seminar hi Taekwondo Federation of India lamin Aizawla tum nga a buataihna niin, kum 2016 kha a hnuhnung ber a ni.
State hrang hrangah pawh seminar hi kalpui mek niin, Aizawl hi chu’ng zinga pakhat a ni a, Mizoram leh a chhehvel state tana buatsaih niin, Aizawlah hian chhimtu mi 20 an awm a; World Taekwondo Competition rules thar ber an zirho hnuah practical leh theory hmangin an exam a, tha takin an paltlang thei vek a ni.
Seminar leh exam hi Taekwondo Federation of India Technical Committee member leh international referee ni bawk Master Joseph Thansanga chuan kaihruaiin zirtirna a pe a, federation kalphung angin exam a endik nghal bawk a ni.
National Referee Seminar kharna inkhawm hi MATA president Prof. Rualkhuma Colney-in a kaihruai a; khuallian Lt. Col. Clement Lalhmingthanga leh MATA general secretary Master Joseph Thansanga’n thu sawiin, Master VL Sawma’n lawmthu a sawi a; MATA hruaitu dangte’n an tawiawm bawk a ni.
National referee exam tur hian state referee, World Taekwondo Black belt leh kum 18 chung lam an ni tur a ni.
MATA hian national referee qualify ni 45 leh international referee pathum a nei mek a ni.