Tahan atangin vohbik mi 80 vel raltlan

Myanmar atangin mi engemaw zat Mizoramah an raltlan a, tun hnaiah vohbik, ‘home’-a enkawl lai mi 80 chuang Mizoram an lut.
Tahan atangin vohbik, ‘home’-a enkawl laite chu a huhovin Champhai district-a Zokhawthar-ah an tlanchhia a, home-a thawkte nen an vaiin mi 86 an ni.
Mi 86-te hian Nilaini tuk khan Zokhawthar hi an thleng a, YMA Hall-ah khawtlang hruaitute’n an awmtir rih.
Zokhawthar VC president Lalmuanpuia’n The Aizawl Post a hrilh danin, an vaiin mi 86 an ni a, anmahni enkawltute pawh an tel. Mahse anmahni enkawltu zat hi an hre chiah bik lo a, mi pali panga vel an ni ang. An home director te nupa pawh an tel.
VC president Lalmuanpuia chuan an home hming hi Chhanchhuahna Home tih a nih thu a sawi a, an home-a bomb a tla a, chumi hnua Mizoram pana chhuak an ni tih a sawi.
An hriat danin, bomb vang hian mi pathumin nunna an chan a, hei hi a ni tak hriat a ni rih lo. An ralmuan loh avangin a huhovin Mizoram hi an pan ta a ni.
“A huhova awmtir an ngai a, chuvangin YMA Hall-ah kan awmtir rih a. Eirawng hi anmahni’n an inbawl thei a, ei tur hi chu ngaihtuahsak an ngai ang,” Zokhawthar VC president chuan a ti a, buhfai tlem azawng chu an rawn keng nia an hriat thu a sawi.
Zokhawthar hi in 800 vel an ni a, raltlan hi mi 7000 vel an awm nia ngaih thin a ni. Mahse tun hnaiah mahni khaw lama kir leh an awm nual a, chuvangin a zat tak hi hriat a ni rih lo. Raltlan awm mek zat hi chhiar that an tum mek tih thu dawn a ni.