Taliban-in pawisa khelhna nia ngaiin chess khap
Afghanistan-a Taliban sorkar chuan pawisa khelhna bul ni thei dawna an ngaih avangin thupek thar an siam leh hma atan an ramah chess an khap.
Thuneitute chuan he infiamna hi Islam sakhaw dan hnuaiah phal a ni em tih finfiahna a awm hma atan khap hmak rih a ni tih an sawi.
Chess hi Taliban-in an rama infiamna lam an khap thar ber a ni a. Hmeichhiate chu infiamna chi zawng zawngah tel an phal lo tawh.
August, 2021-a thuneihna an chan hnuah Taliban hian Islam dan tia sawiin dan leh thupek kenkawhna chi hrang hrang siamin khap leh phal loh an ngah hle.
Pathianni khan sorkara sports directorate thupuangtu, Atal Mashwani chuan chess hi Islamic sharia danah ‘pawisa khelhna a ni thei’ tih a nih thu a sawi.
“Sakhaw thlirna atangin chess hi thil dik lo a niin a lang,” tiin AFP news agency hnenah a sawi a. “He ni theia lang hi chin fela a him tih hriat a nih hma chu Afghanistan-ah khap a ni,” a ti.
Kabul-a thingpui dawr pakhat neitu, tun hnai kum eng emaw ti chhung chess inelna huaihawt thintu chuan sorkar thutlukna chu a zah tih a sawi a, a sumdawnna erawh chuan a tuar hle dawn tih a sawi.
“Thalaiten tun lai khawvelah tih tur an nei tawh lo hle a, mi tam tak ni tin an lo kal thin a ni,” tiin Azizullah Gulzada chuan a sawi.
“Thingpui in pahin an thiante nen chess khelhah an incho thin a ni,” a ti a. Muslim tamna ram dangah chuan an khel tho tih a sawi.
Nikum khan thuneitute hian insualna lam chi, mixed martial arts (MMA) chu ‘a tharum lutuk’ tih vang leh ‘sharia zah kawngah harsatna thlen’ tia sawiin an lo khap tawh.
MMA inelna hi kum 2021 atang khan Taliban chuan ‘hmaia inhnek’ khapna dan siamin khelh an lo phal tawh lo a ni.
Taliban-in pawisa khelhna nia ngaiin chess khap
Get real time updates directly on you device, subscribe now.