Tam tla karah Israel-in Palestian 13 that leh

Tam tla karah Israel-in Palestian 13 that leh
Israeli sipaite chuan naupang leh hmeichhia eng emaw zat telin Palestinian 13 vel an that leh a, hetih lai hian Gaza-ah chuan tam a tla mek zel.
Pathianni vartian atanga beihna thlenga thite zingah hian Palestinian pathum, an lirtheia an tlan lai drone hmanga thah leh Gaza chhim lam, Khan Younis khawthlang lama mihring chennaa bomb puaka thi pahnih an tel.
Hmar lamah Gaza City-a Zeitoun vengah laipuiin in a kahah mi pahnih an thi a, a hma nia Israeli indo thlawhnaten bomb an thlakna, Gaza lailia Bureij refugee camp-ah mipa ruang pakhat chhar a ni bawk.
Israeli sipaite hian Khan Younis-ah Islamic University an kap bawk.
Israeli-ten an beih chhunzawm mek lai hian Gaza-ah chuan Israel-in an mamawh lak luhna a dan vek avangin ei tur, tui, damdawi leh tuialhthei an tlachham deuh vek tawh.
Gaza mihring cheng maktaduai 2.3 chuan engmah an lak luh theih loh avangin an tan mek a, tanpuitu pawlin ei an siamna hmunte pawhin châk an neih tawh loh avangin an inkhar mek zel bawk.
United Nations agency for Palestinian refugees (UNRWA) chuan Pathianni khan kawngpui hi dan chhunzawm zel a nih chuan Palestinian-te tawrhna hi a na dawn tak zet tih an sawi.
“UNRWA hian Gaza-a lut mai thei truck sang tel a nei reng a, an lo luha sem darh turin kan mite an inring tawh bawk,” an ti.
Hamas chuan Pathianni khan thuchhuah siamin Israel hian ‘dan an bawhchhe chiang hle’ an ti.
Israel-a tun thla tira security cabinet chuan Gaza Strip luah vekna tur leh Palestinian-te chu um chhuah turin an ti a. Tanpuina sem hna chu lak chhawn an tum bawk a, military zone siam thar an tum bawk.
UN agency-te pawh an telna, Humanitarian Country Team chuan he ruahmanna hi a hlauhawm tih sawiin ‘mihring inenkawl dan phung nasa taka palzutna leh sipai hmanga inbeihna ruala mi nunna harsatna remchanga hmanga thunun tumna’ tiin an sawi.
Hetih lai hian Pathianni khan Israeli Foreign Minister Gideon Saar chuan US-in Gaza-a puihna thil phurh luh dan tur leh pek dan tur rawtna a siam thar chu tha an ti tih a sawi.
American security contractor, sipai officer hlui leh mi tanpui hna thawktu hotute chuan Gaza-a ei tur leh thil dang pek luh rawtna an siam a, hei hi Israel-in a rawt ang deuh tho a ni.
Ruahmanna hi UN leh puitu pawl dangten chuan an sawisel thung a, semna tur hmun li chauh siam chuan Palestinian tam tak chu Gaza chhim lamah loh theih lohvin a kalkhawmtir dawn tih an sawi.
Gaza-a health ministry chuan Pathianni khan October 7, 2023-a Hamas-in Israel an beih hnua an beih letnaah Palestinian 52,829 vel thi leh hliam tuar 1,19,554 an awm tawh tih an sawi a. Hamas-ten Israel chhim lam an beihnaah khan mi 1,139 vel thatin mi 200 chuang hran turin Gaza-ah an hruai a ni.