Tawng chi thuma ziak Lehkhabu 3 tichhuak

Azadi Ka Amrut Mahotsav lawmna kalpui mekah larsap Dr Hari Babu Kambhampati chuan Nilaini khan Raj Bhavan-ah Dr Laltluangliana Khiangte ziah lehkhabu pathum, tawng hrang chi thum – Hindi, Sap leh Mizo tawnga ziakte a tlangzarh.
Larsap chuan tlangzarh tak lehkhabu pathum chu lehkhabu satliah niloin hnam rohlu a ni, tiin, a ziaktu fakawm a tih thu a sawi a. Dr Laltluangliana Khiangte kutchhuakte enin Mizo literature tana a thawhhlawk piahlamah Mizote chanchin, an huaisenna bakah ram leh hnam chhanna atana an inpekna India ram hmundang amiten an hriat phah nia a hriat thu a sawi.
“Lalnu Ropuiliani chanchin atangin mahni ram leh hnam hmangaihna, mahni hnam chhanna atana nun hlantute an ropui zia leh hlut a pawimawh zia a langchiang em em a ni,” Dr Hari Babu Kambhampati hian a ti a. Mizo thuziakmite zingah Hindi tawnga lehkhabu ziak emaw letling emaw an tam loh laiin, lehkhabu tha tak Hindi-a lehlin a ni chu lawmawm a tih thu a sawi bawk.
Lehkhabu tlangzarh takte chu – Heroes and anti-Heroes (English version), Mizo Nataak 2 : Rani Ropuiliani (Hindi Version) leh History of Mizo Literature (Mizo version) te a ni a. Prof R Thangvunga (Rtd) in lehkhabu hi a thlirlawk a. Mizoram University vice chancellor Prof Dibakar Chandra Deka chuan thu a sawi bawk a ni.