India leh Pakistan indo boruak rit takin min delh mek laiin, tun lai hian social media lamah |awngtai Bethel Camping Centre (TBCC) chungchang a rawn vung thar leh a. TBCC chhunga inrelbawlna fel lo leh dik lo rawn auchhuahpui an awm chho leh ta zut a. Youtube lamah mi chi hrang hrang kawmna tih chhuah a ni bawk a, comment lamah pawh lungawi lo thawm a ring hle a. Hei vang te pawh hi a ni ngei ang, TBCC lamin camper an rawn chhuah chiam a, hei hian boruak a ti tang leh sauh a.
Social activist Vanramchhuangi@Ruatfela Nu pawhin tun hnai khan, Director, Social Welfare Department hnenah, TBCC-a thil thlen dan chungchang chhuitu tur Inquiry Committee din tura ngenna ziakin a theh lut a, sawrkar lam pawhin eng emaw tak tih an tum mek nia hriat a ni.
TBCC boruak hi mipui lam pawhin YouTube lamah chipchiar takin kan hre vek tawh ang a. Nimin tlaia Lengvak Official-in, tunhmaa TBCC-a lo awm ve hrep tawh mi pakhat kawmna an tihchhuahah, an mi kawm pa Lalawmpuia Hrangchal chuan, ‘TBCC-ah hian in fate lo dah reng reng suh u, hreawmna leh sual in zir belhtir duh a nih loh chuan’ tiin Mizoram mipuite a chah thu a sawi chhuak nghe nghe a. ‘TBCC-a thla hnih awm ai chuan Jail-ah kum hnih tan pawh ka duh zawk’ a ti hial bawk.
TBCC hi ruihhlo ngaite tlukluhna ber pakhat a ni a, mi mal enkawl a ni a, sawrkar hnuaia in-register lem lo, Rehab Centre dang anga a nihna tur anga inenkawlna pawh kalpui lem lohna a ni a, chu vang tak chuan tuna harsatna leh buaina ang pawh hi thleng ta a ni, a tih theih awm e.
TBCC enkawltute hi an dik loin an demawm pawh a ni thei e, mihring dikna leh chanvo palzutna nasa tak a thleng pawh a ni ang, thihna a thlen dan pawhin sawi leh sep a kai thin. Heti ang thil a thleng thin a nih chuan sawrkar hian a enfiahin a chingfel tura ngaih a ni a. Chutianga hmalakna chu a awm thin loh avangin tun hi kan thleng ta a ni ber awm e.
Thil tha lo dang a thlen hmain sawrkar hi inrawlh thuai mai teh se.
Tawngtai Bethel Camping Centre
Get real time updates directly on you device, subscribe now.
Prev Post