Lalhminghlua NKB
-- Advertisement --
Kum sawm kalta kum 2013 May ni 16 khan Mizoram chu Tropical Cyclone ‘Mahasen’ in min nuai dawn tih thu chanchinthar leh chanchinbu hrang hrangah a chhuak chuai chuai a, Mizoram mipuite kan manganga kan tiril a khur a nih kha. Khami tum kha kum sangbi sawmhnih pakhat kan hman meka Mizoram mipui kan la thlabar nasat ber pawl a ni maithei e. Sawrkar lam atangin thlipui lo tleh thulha awmdan tur te, tih tur leh tih loh turte a chhuak chuai chuai a nih kha.
Mahasen thlipui tleh ni tura puan lawk May ni 16, 2013 chu Mizoram mipui zawng zawngin thin phu dep dep chungin kan thlir a. Kan nghahhlelh miah loh thlipui kha kan nghakhlel ta zawk emaw tih turin kan ngaihven ber a ni lawi bawk si. Thlipui avanga chhiatna lo thleng thei laka Mizoram kan him theih nan Mizoram chhunga kohhran hrang hrangte leh mitin kan tawngtai nasa hlawm hle a nih kha. Huphurh taka kan lo thlir, thlipui tlehna ni tur May ni 16 zan lam chu a lo thleng ta, mahse mak tak maiin ‘Mahasen thlipui chuan Mizoram min hel a, thlipui siper chiah kan dawng,’ tih chanchin lawmawm a lo thang ta nghal vat a nih kha. Kha thlipuiin min hel chhan kha eng dang vang ni lovin kan Pathianin Mizoram mipui tawngtaina a chhang a ni. Pathianin chhiatna nasa tak thleng thei laka Mizoram min hum kha a lawmawm em em e, kha thil thleng kha kum sawm kalta kha a ni.
Mahasen thlipui a tleh atanga kum sawmna, kum 2023 tawp lamah chuan kan rinna fiahin a awm kan ti dawn nge, kan sakhua nekchepin a awm kan ti zawk dawn? Election Commission of India (ECI) chuan Mizoram MLA General Election vote chhiar ni atan keini Kristiante ni serh Pathianni (3-12-2023) chu a ruat mauh mai.
Hemi vote chhiar ni atana ruat duh lo hian Mizorama pawl hrang hrang leh Kohhran hrang hrangte chuan Central lamah sawn turin ngenna an thlen chamchi a, a hmun hiala zuk kal chilhte pawh an awm, an va fakawm em! Hetihlai hian kohhran hrang hrangte chuan zing leh tlai tawngtai inkhawmah te, kohhran inkhawmahte Pathiannia vote chhiar a nih loh nan bang lovin kan tawngtai reng bawk a nih kha. Chu kohhranhote tawngtaina leh mi thahnemngaite tawngtaina chu Pathianin chhangin, pawl hrang hrang hmalaknate pawh Pathianin malsawm zelin vote chhiar ni sawn a lo ni ta kha a va lawmawm em! Kha’ng zawng zawng tihlawhtlingtu kha tawngtaina chhangtu kan rin Pathian a ni tih hi i hre reng ang u. |awngtai ila, tawngtai ila tawngtai zel ang u, Pathian lo chuan tuin nge min chhang chuang ang. Pathian chu fakin lo awm zel se, kan Kristianaah hian nghetin i ruh zel ang u. India ram zauva chanchintha hril zel tur hian keini Mizo Kristiante hi kan pawimawh em em si a.
Vote chhiar ni chu Mizoram mipui duh danin Pathianni ni lo December ni 4, 2023-ah neih a lo ni ta a, mipui thlanchhuah MLA atana thlan tlin zawng zawngte kan lawmpui vek che u a, tling zo ta lote pawh kan tawrhpui em em a che u. Mizoram Sawrkar thar lo piang hi sawrkar chak tak leh sawrkar tha tak ni turin duhsakna kan hlan bawk e.