Taylor Swift ‘The Tortured Poets Department’ a la No.1

Taylor Swift album thar ‘The Tortured Poets Department’ chu a hralh zatah 83%-in tlahniam mah se Billboard 200 (albums) chart-ah a No.1 a, he chart-a kar hnih a No.1-na a ni ta.
Billboard 200 chart hi kar khat chhunga US-a album hralh tam dan atanga tehin chart ranking siam thin a ni a, Taylor Swift ‘TTPD’ hi a kar hnihnaah 4,39,000 an hralh leh a, chung zinga 3,30,000 chu streaming atanga album hralhna tlukpui (on-demand official stream maktaduai 428.54) niin, album tak tak hralh chu 1,07,000 a ni a, album-a hla mal hralhna atangin 2,000 a tling thei bawk.
TTPD hi a kar khatnaah US-ah maktaduai 2.61 hralhin No.1-ah a debut kha a ni a, a kar hnihnaah 4,39,000 an hralh leh bawk a, tihian kar hnih chhungin US-ah maktaduai 3 an hralh tling der tawh a ni.
Chart top four a lang dang zawng chu No.1 album hlui vek niin, Morgan Wallen ‘One Thing at a Time’ cu 69,000 hralh lehin No.4 atangin No.2 a kai thar leh a, Future leh Metro Boomin ‘We Don’t Trust You’ chu 61,000 hralh lehin No.2 atangin No.3-ah a tawlh a, Beyonce ‘Cowboy Carter’ chu 52,000 hralh lehin No.3 atangin No.4-ah a tawlh ta bawk. Chart top 5 khartu chu Noah Kahan ‘Stick Season’ niin, 41,000 hralh lehin No.7 atangin No.5 a kai tar ve leh ta a ni.
Chart No.1 hlui Morgan Wallen ‘Dangerous: The Double Album” chu 40,000 aia tam deuh hralh lehin No.11 atangin No.6 a kai thar leh ta a, Benson Boone ‘Fireworks & Rollerblades’ chu 40,000 hralh lehin No.8 atangin No.7-ah a insawn leh hret a, chart No.1 hlui Future & Metro Boomin ‘We Still Don’t Trust You’ chu 39,000 hralh lehin No.6 atangin No.8-ah a tawlh a, chart No.1 hlui bawk SZA ‘SOS’ chu 39,000 tling lo deuh hralh lehin No.9-ah bawk a la awm.
Chart top 10 khartu chu PARTYNEXTDOOR niin, a album thar PARTYNEXTDOOR 4 (P4) chu 37,000 hralhin No.10-ah a debut. Tun hi e chart top 10-a a lan vawi thumna a ni a, a hla dang ‘PARTYMOBILE’ chu 2020 khan No.8 a kai a, 2016 khan PARTYNEXTDOOR 3 (P3) te chart top 10 an lo kai tawh bawk.