Taylor Swift ‘TTPD’ 1.4M hralh nghal

Taylor Swift ‘TTPD’ 1.4M hralh nghal
Taylor Swift album thar ‘The Tortured Poets Department’ chu Zirtawpni kalta khan a tlangzarh a, darkar 24 chhungin US-ah ringawt he album hi maktaduai 1.4 a hralh hman a, Swift album ni khat thil thua US-a hralh tam ber a la ni.
Ni khat thilthuaa a album hralh hi album tak tak hralh chauh a ni lehnghal a, streaming leh album-a hla mal hralhna atanga album tlukpui a la tel lo zawk mah mah!
He album deluxe streaming leh digital edition-a hla 31 awm te chu official on-demand audio stream US-ah maktaduai 243.4 ni khat thil thuah a tling nghal a, streaming zawng zawng nen chuan US-ah a ni khatnaah maktaduai 1.6 a hralh tling nghal a ni.
US-a a hralh maktaduai 1.4 hi CD, vinyl, cassette leh digital download te a ni a, Swift hian he album hmaa a album tlangzarh tawh zinga kar khat chhunga a hralh that ber pawh a ni khatnaah a rawn khum nghal a, a album US-a kar khat chhunga a hralh tam ber record chu a re-recorded album ‘1989 (Taylor’s Version)’ kha niin, kar khat chhungin US-ah maktaduai 1.359 a hralh thei a, mahse, he record hi ‘The Tortured Poets Department’ hian ni khatah a khum nghal a ni.
TTPD hi April ni 19-a tlangzarh kha niin, digital download album-ah hian hla 16 a awm a, a physical configuration-ah hla 17 a awm bawk. He album hi kar khat chhungin US-ah maktaduai 2 an hralh tling thei ngei dawnin a lang a, Billboard 200 (albums) chart-ah pawh No.1-ah a debut ngei dawn a, Swift hian No.1 album 14 a nei tling thei dawn ta a, hmeichhe zaithiam zinga he chart-a No.1 album ngah ber a nihna a sawhnghet leh sauh dawn a ni. Soloist zingah pawh Jay-Z nih rualin, soloist zinga No.1 album ngah ber a ni ve ta bawk. Swift hian phak loh pakhat chiah a nei a, chu chu The Beatles niin, anni hian No.1 album 19 an nei.