Telangana inthlan campaign turu takzet

Inthlan campaign turu tak neih a nih hnuah November 30 hian Telangana Assembly election neih a ni dawn ta a. Inthlan campaign laiin thil thleng a nasa hle.
Campaign laia beisei loh em ema inbeihna thlen nasa ber chu thenawm state Congress rorelna Karnataka daih niin BRS te chuan Congress te chu Karnataka ‘an thutiam’ tihlawhtling lo tiin an puh a. Hei mai bakah hian telvision channel kaltlanga inbeihna a nasa bawk a. Congress leh BRS te inbeihna nasa tak avangin EC pawh a inrawlh hial a ni.
Telangana inthlan hi rorel lai BRS, Congress leh BJP te tana pawimawh tak vek niin hei vang hian campaign lai pawhin inpuhmawhna hruaitu lawk te karah a nasa hle. BRS President leh CHief Minister ni bawk K. Chandrashekhar Rao chu eiru nasa a puh leh an chhungkuain rorel tawp anga puhna chu inbeihna lian ber pawl a ni bawk.
Congress leh BJP te campaign sulsutu ber chu Rahul Gandhi leh Prime Minister Narendra Modi te niin PM Modi pawhin election campaign ah hun a hmang nasa hle a. Amah mai bakah Union Minister thahnem tak te an kal bawk a, Congress pawhin an hruaitu lawk tinte chu Telangana-ah campaign-in an tirlut vek a ni.
Tun inthlanah BRS tan KCR chuan hma hruaiin a fapa leh working president ni bawk K.T. Rama Rao, Minister for Finance T. Harish Rao leh a fanu leh Member of Legislative Council K. Kavitha ten hma an hruai a. BRS chief hian election meeting tum 96 lawih a nei a ni.
Ni tin election rally pathum pali neiin State hmun tinah helicopter in a kal mai a. KCR chuan a sorkarin welfare leh development scheme a kalpuite chu aupuiin Opposition Congress leh BHP te chu opportunistic politics kalpuiah a puh thung.
KCR chuan zei takin inthlanah chak lo se engmah hloh tur a neih loh thu sawiin mahse State chu party dangte kutah awmin a tuar nasa dawn a ni a ti bawk a. Welfare leh development scheme-ah Congress te chu Karnatak-ah hlawhchham thakah puhin power supply ni khatah darkar nga vel zet a pe thei lo a ti bawk a.
Campaign tawp dawn lamah Rythu Bandhu assistance pek tur dan a ni chuan BRS leh Congress te inakrah tawngkam naataka inbeihna a thlen bawk a. Party pahnih te hi Election Commission chuan natakin a khak nghe nghe a ni.
Congress te chuan eirukna leh family rule chu sawi berah neiin hei bakah hian Telangana mipuite tan guaranteess paruk a tiam a. An thutiam an tihhlawhtlin tur zia lantir nan Congress leader te chuan door-to-door campaign neiin in tinah guarantee card semin an sorkar atanga ni 100 chhunga tihhlawhtlin an intiam bawk.
Rahul Gandhi leh Priyanka Gandhi tena Mulugu district a campaign an neih dun chuan nasa takin phurna a thlen a. Chumi hnauah North Telangana fang zuiin chuan chuan boruak a siam lian hle bawk. Gandhi family te chuan a tam thei ang ber mi hmu in a remchang a piangin voters te nena inbiakna an nei bawk a. September 17-ah guarantees paruk tlangzarh tura Sonia Gandhi an hman chuan Central leadership-in Telangana an ngaih pawimawhzia a pholang chiang hle a ni.
Rahul, Priyanka leh Mallikarjun Kharge leh Central leaders tena campaign an kalpui chuan phurna a siam nasa a. Heng hruaitute hi mipui tena an ngiat te an nih vang a ni.
BJP campaign chu Prime Minister kaihhruaiin Union ministers – Amit Shah, Rajnath Singh, Smriti Irani leh hruaitu lawk dang te an tel a. Central leader rual – Tarun Chugh, Sunil Bansal, Prakash Javdekar leh B.L. Santosh ten campaign strategy siamin an vil chawt bawk. BJP ten sawi bera an neih chu eirukna, chhungkua rorelna leh Centre welfare leh developmental scheme te Telangana-in a chhawrna te a ni.
Telangana inthlan campaign laiin tawngkam duhtuilohna a nasa hle a. BRS leh Congress top leader te chuan insumkarna nei lovin an inbei na hle bawk a ni.