Television fiah lo inleitir avanga pawisa chawitir thu
Lallunghnema
Charity Lodge
Cont: 9862288182
Kumin 2025 hian bahlah lovin consumer article chawlhkar tin ka la ziak thei a. Ka lawm hle a ni. Pathian min hruai dan hi a lungawithlâk tak zet a. Ka article lo chhiartute hnen atangin chanchin lawmawm ka dawng fo bawk a. Kei a article ve hi, an lo tangkaipui tih ka hriat hian min tilawm a, min tichak a, min tiphur thin a ni. Tha za lo chung pawhin ‘ka kawlawm’ ka hum phah thei a, article ka puitlin leh mai thin. Ka thu leh hla lo chhiartuten in hlawkpui vek em phei chu ka hre lo. Mahse, mi thahnem tak aw kâ ka hriat te hian phurna nasa tak min pe thin zawng a nih hi!
Ka ziak zel ang a, ka kut leh mit, ka hriselna leh theihnain a tlin chhung chu ka kawlawm hi ka thlah lovang a, ka vuan zel dawn a nih hi! Ka thianpa pakhat chuan Consumer Huang a chhiar ziah thu min hrilh a. Ani chuan, “Ziak peih an awm phawt chuan a chhiar tal kan tum ve tur a ni,” a ti mauh mai. Ani ang hi a sing a sing awm se, kan va changkang dawn teh lul em! Ka tih phah a ni.
Consumer kan thang harh mek zel. MRP pawh thil zuartutin an ngai pawimawh tan a, an thil an hralh hian ti tha an inti thin. Hei erawh a la dik lo. A dik chu ‘MRP aia hniama thil hralh’ hi a ni. Mizo rilru hi chu heti tlat hi a ni a.
Hlêp tam a, hralh tlêm pawi ti lo. Hlêp tlêm a, hralh tam hisap pha lo! Income tlêm, hlêp tam hi kan rilru put hmang, hlawhtlinna tlang atanga min pawt thlatu a ni. Amah dawrkai changin a tuar lova, consumer zawng zawngin an tuar vek a ni He rilru hi a huat thla la hle a ni.
Bazara i kalin Television i lei thin em? I TV lei chu a chhe thin em? I Tevision hmai chu a fiah lo em ni? TV hmai fiah lo zawrh leh inleiluihtir hi Consumer Right bawhchhiatna a ni.
Covid lai khan nu pakhat chuan TV thar a lei a, a han chhuah(switch on) a, a lo tha hauh lo mai a. Television zuartute hnenah a han report a. Anni chuan an lo siam a, an siam tha thei lova, TV thar an lo pe a ni. He thu hi ka ziak tawh. Keia kar hi min lo pun a, TV zuartute nen chuan tha taka indawrin chu nu harsatna chu sut kiansak a ni. An lawm hle mai.
Kawng engkimah State dang mite hi an changkang zawh deuh em aw? tih turin thil a thleng fo thin. Consumer Awareness an neih bik vang em em pawh a ni bik lovang. Thil lei leh hman an uluk a, an fimkhurin pawisa an hmang thiam hle. Hei vang hi a ni ang e, thil lei thleng an awlsam hle a, buk an uluk hle a. An phunchiar a, awmze neiin an sawisel thin. Keini chuan kan remti lo bur thin a ni lawm ni?
I Television lei chu a chhia em? I complaint ngai em? TV leitu chu consumer a ni. Sec 2(7 Consumer Protection Act 2019-ah consumer i nih tarlan a ni e. DIKNA leh CHANVO i nei e. Huaisen takin i chanvo leh i dikna i champion-pui thei. I ngam leh ngam loh a ni zawk. Mi dawizep tan dan siam a ni lo, mi huaisen leh rinawmte tan bawk Dan hi siam a ni.
Vairama thil thleng hi kan lo entawn leh kan zir atan ka han sawi leh dawn a ni.
Engineer pakhat Bairamalguda Hyderabad-a cheng M.S.V chuan Television a lei a. Mahse, chu a TV lei hmai chu a fiah lo ruai mai a. A Television leina dawrah chuan a complaint a. Mahse, vawi tam tak a complaint hnu pawh chuan eng mah an tihsak duh lova. He engineer pa hian Hyderabad Disputes Redressal Commission hnena complaint thehlutin he TV zuartu leh company chu a khing ta a. He commission hian TV zuartu leh TV siamtu company chu Rs. 57,671/- ve ve chawi tur leh rilru tihnat sak man(mental agony charge) Rs. 10,000/- leh commission a complaint buaipuina man Rs. 3000/- chawi turin judgement a tichhuak ta a ni. (Source-yashwanisri e timesofindia.com)
Mizoramah hian District-tinah Consumer Commission kan nei a. Heng commission te hian complaint an ngah hran lova, an lawmman nen pawh khaikhin hleih theih pawh a ni lo. A pawimawh ber chu thil zuartu leh service provider-te an pawimawh rualin leitu leh hmangtu (consumer-te) hi an chak a ngai a. Pawisa hlutzia te hi hria a, thil lei leh hman chhuahte, hralh leh pek chhuahahte hian tute pawhin sum hlutzia hria a, kan fimkhur tlan a ngai hle a ni.
India ramah hian Dan a lal a Consumer Protection Act & Rules te phei chu kan hman tangkai a pawimawh hle.
I thil leia harsatna i neih chuan kan pui thei reng a che.