Tennis inelna lian Grand Slam

Infiamna ngaihsan hlawh tak ‘Gentleman’s Sport’ an tih hial thin chu ‘Tennis’ hi a ni a. Tennis-ah hian inelna lian bik pali; Australian Open, French Open, Wimbledon leh US Open te a awm a. Heng inelna lian palite hi ‘Grand Slam’ tih an ni.
‘Grand Slam’ tih hi hriatthiam awlsam danah chuan; ‘inelna lian ber, lawmman leh ranking point pawh tam ber, mipui leh media te pawhin an ngaihven ber leh game khelh chhung pawh rei ber’ tihna a ni. Tennis-ah hian inelna hrang hrang a awm a, inelna dang zawngah chuan mipa leh hmeichhiain set thum zel an khel thin a. Grand Slam-ah hi chuan mipain set nga an khel a, hmeichhiain set thum an khel ve thung. Grand Slam-a champion te hian ranking-ah point sang hnih (2,000) theuh an neih belh thin. Grand Slam hrilhfiahna ang hian inelna dang zawng zawng aiin Grand Slam pali-ah hian lawmman leh ranking point a tam ber a, mipui ngaihven hlawh ber a ni bawk.
Tennis-a ‘Grand Slam’ hi kum 1933 khan hman tan a ni a, a chingchhuaktu chu American journalist John Kieran a ni. Kum 1933 khan Australian Tennis player Jack Crawford chu inelna lian pali, Australian, French, US leh Wimbledon-ahte champion vek thei dinhmunah a ding a. Australian, French leh Wimbledon-ah a champion hnuin US Open-ah final lut leh mahse, final-ah a vanduai hlauh thung. Jack Crawford hi inelna lian pali a champion vek theih a nih lai hian Journalist John Kieran hian inelna liana palia champion sawi nan hian ‘Grand Slam’ hi a hmang a. Heta tang hian ‘Grand Slam’ hi an hmang zui ta zel a ni.
‘Inelna lian ber, lawmman leh ranking point pawh tam ber leh mipui pawhin an ngaihven ber’ tia ‘Grand Slam’ kan hrilhfiah bakah hian ‘Grand Slam’ hian awmze hrang leh kawh hran a nei ve leh thung. Inelna lian bik pali (Grand Slam) ah kum khat chhunga champion vek sawi nan ‘Grand Slam’ hi hman a ni ve leh. Kum khatah Grand Slam pali-a champion vek thei mi panga (5) chiah an la awm a, chungte chu; Don Budge (1937), Maureen Connolly Brinker (1953), Rod Laver (1962 & 1969), Margaret Court (1970) leh Steffi Graf (1988) te an ni.
Kum khatah Grand Slam pali a champion vek sawi nan ‘Grand Slam’ hman a nih lai hian kum khata champion vek kher lo, Grand Slam pali-a champion kim sawi nan hian ‘Career Grand Slam’ tih a ni ve leh. Tennis huanga ngaihhlut hlawh ber chu ‘Super Slam’ a ni a. Hei hi kum khatah Grand Slam pali-a champion kim vek bakah Olympic-a champion a, ram leh ram inelnaa champion b^kah kum khata player che tha zual inelna ATP / WTA Finals-a champion sawina a ni. Leilung pian tirh ata tun thlengin ‘Super Slam’ puitlin thei an la awm lo. Ngaihhlut hlawh >m >m pakhat chu ‘Golden Slam’ a ni leh. Hei hi kum khatah Grand Slam pali a champion b^kah Olympic a champion bawk sawina a ni a. Tun thlengin Golden Slam puitlin thei pakhat chiah a awm a, chu chu Germany Tennis player popui, Steffi Graf a n.
Tennis inelna hi hun pui pahnihin then hran phawk a ni a, a hmasa z^wk chu ‘Amateur Era’ tih a ni a. Hei hi kum 1968 hma lam zawng sawi nan hman thin a ni. Kum 1968 atang hian ‘Open Era’ tih a ni ve ta thung.
Grand Slam palite :
Australian Open : Kum khata Grand Slam khelh hmasak ber Australian Open hi kum 1905, November thla khan khelh tan a ni a, hun eng emaw chen chhung chu Grass Court-ah khelh thin a ni a. Kum 1988 atang khan Hard Court ah khelh tan niin, tun thlengin Hard Court hman zui a la ni ta reng. Melbourne, khawpuia ‘Melbourne Park’-ah Tennis khawmpui lian nghah thin a ni a. Tuna an chhuat phah hman mek hi ‘Green Set’ niin, kum 2020 atang khan an hmang tan. Australian Open hi kum thar tir January thla chawhnu lam atangin khelh tan thin a ni.
French Open : Grand Slam pali zingah Clay Court a khelh awmchhun French Open hi kum 1891 daih tawh khan inelna neih tan a ni a, kum 1925 atang khan Grand Slam-ah telh tan a ni. Kum 1928 atang khan tuna an khelhna Stade Roland Garros-ah hian khel tan a ni. May thla chawhnu lamah khelh tan niin, June thla tir lama zawh fel thin a ni. ‘Roland Garros’ tia hriat lar ni bawk French Open-ah hian vawi 14 zet champion tawh Rafael Nadal chu mipa lamah champion ngun ber a ni a, hmeichhe lamah vawi sarih champion tawh Chris Evert chu champion ngun ber a ni ve thung.
Wimbledon: Inelna lian zual Grand Slam pali zingah rau rau pawh Wimbledon hi ngaihhlut hlawh ber a ni a. Wimbledon-a tel ten hmun dang angin an duh zawng zawng thawmhnaw an inbel ngawt thiang lova, thawmhnaw var vek an inbel thin. Thawmhnaw var veka inthuam hi tunhma atanga chin dan thana an lo neih vang a ni deuh ber.
‘The Championship’ an tih hi Tennis inelna upa ber a ni a, kum 1877 daih tawh khan inelna neih tan niin, Grand Slam pali zingah Grass Court-a inelna awmchhun a ni. Grand Slam dangte angin Grass chunga inelna a awm tam ve loh av^ngin Wimbledon-ah hian thiam fal bik tan lo chuan chet that a harsa a, hnim chunga che tha turin insiam rem an harsat tlangpui thin. Wimbledon hi June thla chawhnu lamah khelh tan niin, July thla tir lamah zawh fel thin a ni. He inelna ngaihhlut hlawh takah hian vawi riat champion tawh Roger Federer chu mipa lamah champion ngun ber a ni a, hmeichhe lamah vawi kua champion tawh Martina Navratilova chu champion ngun ber a ni ve thung. Wimbledon-ah hian kum 2022 khan lawmman £35,000,000 sem ral a ni.
US Open : Kum khat chhunga Grand Slam khelh hnuhnung ber ni thin US Open hi kum 1881 atang khan inelna neih tan a ni a. Grass Court-ah inelna neih tan a ni phawt a, kum 1975–1977 chhung khan Clay Court-ah inelna neih a ni leh a, kum 1978 atang khan tun thlenga inelna an neihna thin Hard Court-ah hian inelna neih tan a ni ve thung. US Open-ah hian mipa lamah Richard Sears, William Larned leh Bill Tilden te chu vawi sarih theuh champion tawhin champion ngun ber an ni a. Hmeichhe lamah vawi riat champion tawh Molla Mallory chu champion ngun ber a ni ve thung. August thla tawp lam atanga khelh tan thin US Open-ah hian kum 2021 khan lawmman US Dollar 57.5 million sem ral a ni a, US Open hi Grand Slam pali zingah lawmman tamna ber a ni.
‘Gentleman’s Sport’ tiin Tennis hi sawi ni thin mah se mipa pawl; Association of Tennis Professionals (ATP) leh hmeichhe pawl ‘Women’s Tennis Association’ (WTA) an awm hrang tlat thung a. Heng pawl pahnih; ATP leh WTA te hi inchhunfin a, pawl pakhat din tumin indawr thin mah se an la hlawhtling thei rih lo.