Tha chungchuang Cristiano Ronaldo

(February ni 5, Cristiano Ronaldo piamcham, a kum 40 tlin pualin he thuziak hi kan rawn her lum e!)
Lallianmawia Pachuau khan:
A lo duang thiam ngei che,
Khuanu leng pawh hian;
|ha chungchuang tura’n maw?..
Tiin kum 1985 khan Miss Mizoram hmasa ber C. Lalbiakzuali tan hla mawi leh ril fahran mai a lo phuah a. Zaithiam leh hla phuah thiam mibik; Lallianmawia Pachuau hian Cristiano Ronaldo football khel hi en ve ta ngat se ‘|ha chungchuang tura’n maw,” a ti ve thoin ka ring.
October ni 9, 2022 Pathianni zan khan player ropui Cristiano Ronaldo chuan Everton laka Manchester United chakna goal a thun a. Ronaldo hian minute 44-naa a goal thun hmangin a dai ngai loh ram daiin, mel lung pawimawh tak a phun belh a; khawvela football player piang tawh zawng zawng zingah club tan goal 700 thun tling thei hmasa ber leh awmchhun a ni.
Player ropui, a thawhrim leh taihmak em vanga ropui leh zual Cristiano Ronaldo hian Everton lakah bul a tan phak lova, bench-ah a thu hmasa phawt. Goodison Park-a inkhelah Everton nen 1-1 a an inhnehtawk laiin United forward Anthony Martial a inhliam a, lakchhuah a ni. Anthony Martial hi club tan goal 699 thun tling tawh Ronaldo hian a thlak a, mual chhung a lut. Mualchhung a luh hnuin danglamna thlen nghal rum rum bik lo mahse minute 44-na a thlen meuh chuan a chin than angin thil ropui a thlentir leh ta nge nge a, United hmahruaina goal a thun. Minute 44-naa goal a thun hi United in an chakpui bakah mellung pawimawh tak phun nan a hmang a, lungte pakhain sava pahnih a vawm thla. Footballer piang tawh zawng zawng zingah club tan goal 700 thun tling thei hmasa ber niin record ropui a siam. Club tan goal 700 thun tling tur hian game 943 a mamawh a, season tinah goal 35 thun tling ziah ang a ni.
Ronaldo hian a chawrchhuahna Sporting Lisbon tan vawi 31 khelin goal a 5 a thun hman. Manchester United nen Friendly match an khelh tumin a chetha hle a, United player te a bum kual nasa hle. An zinna ram atanga an haw kawngah United player te chuan Ronaldo thiamzia hahipin an sawi a, an boss Sir Alex Ferguson-a hnenah an team a la lut turin an nawr hial hlawm. Tichuan, United chuan kum 2003 khan an la lut ta tak tak a, khawvelin footballer ropui a neih belh.
Premier League club ropui Manchester United-ah C. Ronaldo hian par a chhuang a. Vawihnih a zawm tawh United tan hian inelna hrang hrangah vawi 254 zet a khel tling tawh a, goal 145 a thun tling. United-ah ropui taka a inlan hnuin kum 2009 khan khawvela football club hausa ber leh hlawhtling ber Real Madrid a zawm a, La Liga club lian Real Madrid-ah Ronaldo tha zual zawk hmuh tur a awm. Champions League-a champion ngun ber Real Madrid tan hian inelna hrang hrangah vawi vawi 438 a khel a. A khelh zat aia tam goal thunin, Real Madrid tan hian goal 450 zet a thun tling.
Real Madrid chhuahsanin kum 2018 khan Italian Serie A club lian Juventus a zawm. Juventus-ah hian kum hnih a cham hman a, vawi 134 khel hmanin, goal 101 a thun. Juventus atang hian a larchhuahna Manchester United-ah kum 2021 khan a kir leh a, October ni 9, Pathianni zana Everton laka chakna goal a thun hmangin club tan goal 700 a thun tling ta chiah a ni. United tan a khelh nawn leh hnuin sum tamna Saudi Arabia lam a pan a. Kum 2022 khan Al-Nassr zawmin, he club-ah hian tun thlengin a la khel. Al-Nassr tan hian inelna hrang hrang hrangah vawi 95 a khel tling tawh a, goal 87 zet a thun leh der tawh bawk.
Club tan goal 700 thun tling thei hmasa ber Ronaldo hian goal 700 a thun atanga goal 460 zet hi a ke ding lam hmanga a thun a ni a. Goal 125 zet hi a ke vei lam hmanga a thun a nih bakah goal 113 zet hi a tauh goal a ni bawk a. Goal hnih dang hi a taksa peng dang hmanga a thun a ni cheu bawk. Hei hian Ronaldo thiam chikimzia chiang takin a lantir a. Kawng hrang hranga Ronaldo hlauhawmzia tichiang lehzualtu a ni bawk. February 3, 2025 – Thawhtan zanah Al Wasl lama goal a thun hnuin Ronaldo hian footballer zingah tha famkim ber a nih thu a sawi hial nghe nghe.
Kum 40 pianchamphaphak lawm zawl hlimhlawl Cristiano Ronaldo hian club tan vawi 1,046 khel tawhin goal 788 a thun tling tawh a. Portugal tan vawi 217 zet khelin goal 135 a thun tling tawh bawk a, club leh ram tan goal a thun zawng zawng hi goal 923 zet a ni a. Footballer zingah goal 1000 thun tling hmasa ber nih tumin hma lam a pan mek zel. Goal 1000 a thun tling thei a nih ngat chuan ‘|hachungchuanga’ tih a pu zo leh zual khawp ang le! C Ronaldo hi football player piangchhuak tawh zawng zawng zingah ram tan goal thun hnem ber record siamin, a record a tizual zual zel. Chumai a ni lo UEFA Champions League-ah goal 140 thunin goal thun hnem a ni cheu bawk. Em em an aa..!
Pathian pek thiamna hlawhtlinpui an awm a nih chuan Messi a ni ang a. Thawhrimna leh taihmakna vanga hlawhtling an awm a nih ngai chuan chu chu Cristiano Ronaldo hi a ni thung ang.
Infiammi zinga hausa ber pawl Cristiano Ronaldo hi chaw chhuma inhlawh thin Maria Dolores dos Santos Viveiros da Aveiro leh huan enkawl baka hna penhleh dang thawk ve lawp lawp thin José Dinis Aveiro te fa pali zinga a tlum ber ni turin February ni 5, 1985 khan Madeira, Portugal-ah piangin khawvel eng a lo hmu a. Sum an lak luh tlem bakah a pa hian zu a in nasat vangin an khawsak a harsa thei hle a. Fa pathum lai an lo neih tawh bawk vangin a nu hian a pai laiin Cristiano Ronaldo dos Santos Aveiro lo ni ta hi tihtlak mai a duh hman hial a. Doctor ten an khap daih theih hram vangin titla em lovin a hring ve ta hram a, fapa rangkachak an hring a lo ni reng si.
Roman Catholic in khawsak harsate chenna atan an sak atanga seilian Ronaldo hian football a tuipui chho viau a, nuam ti takin inkhel thin mahse a kawng a harsa viau thung. Kum 15 mi lek a nih laiin a lung a tha lo ( tachycardia) tih hmuhchhuah a ni a. A lung chu a phut dan pangngai aiin a phu rang tih hmuhchhuah a nih vangin football khel zui thei lo tura ngaih a ni. A lung hi zai a ni a, uluk taka enkawl a nih hnuin a phut dan tur pangngaiin a phu ve thei ta mai a. Engthawl takin football a khel chho thei leh ta hlauh. Tichuan, hun a kal zel a, tunah chuan footballer ropui sawi apianga sawi hmaih tawh ngai loh tur Cristiano Ronaldo hi a lo ni ta a ni.
Mi tam takin Ronaldo aia an dahsan Lionel Messi hian a hranpa takin free kich chhuih a zir ngai hran lo an ti teh tlat. Ronaldo erawh hi chu player pawimawh leh hlawh hnem ber a ni chung pawhin a inthlahdah mai mai ngai lo. Traning ground thleng hmasa ber a ni fova, training pangngai zawh hnuah pawh free kick leh thil dang dang zir zui tlauh tlauhin hawh tlai ber a ni fo thin bawk an ti thung. Ani hi chuan a thiamna, a hlawhtlinna leh a ropuina zawng zawng hi a suala a sual chhuah a ni a. Chawimawina leh hlawhtlinna a dawn zozai hi inpekna nasa leh thawhrim vawr tawp hmanga a hlawhchhuah a nih vangin lawm pawh a lawmpuiawm bik.
Loan a Real Madrid zawm ve zuai tawh Arsenal forward hlui Emmanuel Adebayor khan a tia lawm, “Real Madrid ka zawm tirh khan chawhma dar 10:30-ah training neih tan tur tih min hrilh a. Dar 8:30-ah thleng ta ila, thleng hmasa ber ka ni thei ang ka ti rilru a. Zing dar 8:30-ah chuan ka thleng ta ngei a, coaching staff lo awmte hnenah thleng hmasa ber ka ni em tih ka zawh chuan Ronaldo thlen tawh thu leh tui a chen mek thu min lo hrilh,” a ti. Hei hian player thawkrim leh inthlahdah ve ngai lo a nih zia a tilang chiang hle.
Footballer ropui fal pahnih; Cristiano Ronaldo leh Lionel Messi te hian khaikhin an hlawh fo va, an inkara tha zawk thlan tum chu inhnialna tawp thei lo chawhchhuahna mai niin a lang. Kei tak ngial pawh hian ‘Tu nge thiam i tih zawk?’ tih zawhna ka dawng ve nawlh nawlh fo. Argentina tan rumruttu ka ni a. Real Madrid aiin Barcelona ka tan zawk zel bawk. Arsenal tan rumruttu ka nih vangin Manchester United hi ka tan tan ngaihna a awm lo hualhual. “Arsenal ka tan ber a, Arsenal dawtah chuan United khingpui apiang ka tan” ka ti ve thin. Cristiano Ronaldo ai chuan Lionel Messi hi thiam ka ti zawk a, tan pawh ka tan zawk. Chuti chung chuan ka team a tel turin pakhat thlan a, pakhat thlauhthlak tur ni ta se Messi thlauhthla in, Ronaldo ka thlang thung a. Mak in ti em?, a mak si lo.
Chak duh luat vanga theihna zawng zawng hlan thin, chak duh luat vanga tap lek lek khawpa tan khawh thin, mualchhunga inthlahdah ve ngai lo, mual chhung khawilai pawh kar tawn zung zung thin, taima leh thawkrim Cristiano rilru put hmang hi a dik ka ti. Hnehna chan tuma a theihna zawng zawng hlan thintu Ronaldo hi thatchhe taka tlan a, a zawi hnek hnek hmel i hmu tawh em? I hmu lo vang, chu chu a lawm Messi aia Ronaldo ka thlan chhan tur chu. Captain atan chuan Roy Keane ka thlang thung ang.
Ziaktu : Hmaa Hauzel