Thailand leh Cambodia an inbei thar leh nasa

Thailand leh Cambodia an inbei thar leh nasa
Thailand leh Cambodia ramte ramria an intihbuai thar lehna chuang huang a zauh zel a, inthenawm ram inbeihnaah hian thi pawh an pung zel.
Cambodian national defence ministry chuan Thawhtanni atanga buaina chhuakah hian civil mi pakua thiin 20-in hliam an tuar tawh tih a sawi a. Thai sipaite pawhin sipai pali thiin 68-in hliam an tuar niin an sawi bawk.
July thlaa ni nga chhung an inbeih hnua inkahhai an puan hnua Pathianni zan atanga chhuak thar leh avang hian ramri hrula cheng mi sang telin an in chhuahsanin hmun him an pan.
July thlaah khan ramriah ram inchuhin rocket leh laipui hmangin an insai a, mi 48 vel thiin mi 3,00,000 chuang an insaseng a, Malaysian Prime Minister Anwar Ibrahim leh US President Donald Trump ten dawrin inkahhai puan zui a ni.
Thailand chuan thla hmasaa rah puah bomb puaka an sipai pakhatin hliam a tawrh hnuah inkahhai inremna hi hman rih lo turin a ti leh tawh.
Thai Prime Minister Anutin Charnvirakul-a chuan Cambodia-in indawr turin engtin mah a la biakpawh loh thu leh indona kalpui zel a ni dawn tih a sawi.
“Kan tih tur chu kan ti mai dawn a ni,” a ti a. “Sorkar chuan sipaiin beihpui thlak dan tur an ruahman tawh ang chu kan thlawp zel ang,” a ti.
Thai sipaite chuan Thawhlehni khan Cambodia-in laipui, rocket leh drone hmangin an sipaite awma an bei niin a sawi.
Cambodia-a Senate President Hun Sen chuan Thawhlehni veka social media-a thuchhuah a siamah a hma ni khan an sipaiten Thai sipai an kah rih loh thu leh zan atangin an kap let tan tih a sawi.
An tum chu Thai sipaite hma lam pan mekte niin Cambodia-a sipaiten ‘beih let thut hmangin an lo chhu let a, hmelma sipaite an tichhia’ tih a sawi.
“Cambodia chuan muanna a duh a; mahse, Cambodia hian a ram veng turin a bei zel ang,” tiin prime minister hlui hian a sawi bawk.
Lehlam lehlam hi silai hmet puak hmasa zawkah an inpuh.
US State Department chuan Thawhlehni khan indona chhuak leh chu an ngaihven tih a sawi a. “Inbengdaia civil mite himna tur ngaihtuah tur leh October 26-a Kuala Lumpur Peace Accords siam kalpui turin ngen an ni,” tiin Secretary of State Marco Rubio-a’n a sawi.
Thawhlehni tukah khan Thai lawng sipaite chuan tuipui kama Trat province atangin Cambodian sipaite an um chhuak tih an sawi.
Navy chuan Cambodian sipaite hi an pung a, ralsai thiam leh ralthuam lian an inchhawp a, an tanhmun siam thain trench an lai niin anb sawi a, ‘hetiang hi chu Thailand tana hlauhthawnawm a ni’ tiin beihpui an thlak mai loh nan an um chhuak tih an sawi.
Indona chhuak leh avang hian lehlam lehlamah ramria awmte an insaseng a. Thailand chuan mi 4,00,000 vel an thiar chhuah thu sawiin Cambodia pawhin mi 55,000 chuan an sawn chhuak tih an sawi.
Thailand-a 2nd Army Region chuan ramri hrul province paliah awm lailawkna tur 500 dawn an siam thu an sawi.
Kum 100 chuang zet Thailand leh Cambodia hi km 817 an inrinaah buaina an nei tawh a, ramri hi kum 1907-a France-in Cambodia-a ro an rel laia an rin a ni.
An lo intibuai zauh zauh tawh thin a, kum 2011 pawh khan laipuiin an lo insai chiam tawh.
Kum 2013 khan International Court of Justice (ICJ) chuan kum 1962-a thutlukna a lo siam tawh angin UNESCO World Heritage Site Preah Vihear temple chu Cambodia ram a nih thu leh Thailand chu a chhehvela an mi awmte dah sawn turin a ti.
Thailand chuan ICJ thutlukna hi a pawmpui lo thung.