Zoremi Hmar Zote
-- Advertisement --
Mi tam takin hausa kan teh dan leh mi thenkhatin hausa kan teh dan te, changkang leh changkang lo kan teh dan te a inang lo thluah ang chiah hian, mi awhawm leh hmuingil, mi hlawhtling kan tihte hian hetiang nun nei tur hian eng ang takin nge an invawn a, an lo beih kan hriatpui vek lo va, malsawmna leh vanneihna ensan leh hringnun duhawmnain hmai a hupsan tâk ni hiala mawi te hian chutiang nun chu an phû rêng em, nge an vanduai ve hrim hrim; zawhna tam tak siam thei, chhanna erawh inang lo nuaih tho tur si a ni.
Nunna min petu, min siamtu chu Pathian a ni. Hringnun atan duan lâwk emaw, kan chan tura lo ruatsa a nei emaw tih mai tura mahni inpal harh nawkna tur thil thleng ve fo thin pawh hi, ‘mihring siam that nan khawdur a ngai’ tih kha a ni deuh mai, kan chunga thleng apiang a remruat anga chhàl vek emaw, thil tha lo lam thlenga puh vek mai hi a fuh ber viau lo mai thei.
Tu emaw, a pian tirh ata hrisel taka lo sei lian, lehkha thiam chho em em, sawiselna tur vâng raih khawpa nun mawi leh entawn tlâk, hna zahawm leh tha tawk tak thawk ta bawk hi sawi tur in hre nual em? Kei paw’n ka hre nual. A rûk taka a nu leh pate pawhin an chhuan, mi nu ten an fate zilh nan, an entawn atana a chanchin an sawi thin khawpa nula/tlangval fel in hre nual ang, kei pawhin ka hre nual mai. Engati nge hetiang mi hi an loh nih bik a, engtin nge heti tak mai hian an fel theih bik! Zawhna chhân har lo tak a ni, khai mah aw.
Hetiang mi, hlawhtling leh hmuingil tak, mi zahawm tak te hian a hmasa berah nu leh pa thu an awih tlangpui a. Chu chuan an hma lam hun tur thui tak a hril a, an kawng tluang purh mai tur chu a lo chhun lâwk ruih tawh mai thin. Hlawhtlinna tak tak awmzia an hria a, changkanna tak tak an hria a, hringnun hlutna an chhût chiang thin chumi thleng tur chuan nu leh pa kaihhruaina hnuaiah, naupang thu awih thei tak an ni phawt a, tleirawl fel tak niin, nula tlangval fel tak an ni ta zel a; chu tak chu chunglam khian mal a sawm châk a ni.
Zofate zingah, ‘thalai ten hma kan sâwn chak lo, hna kan thawk tha peih lo va, thil engkim mai a changkang-kang leh incheina thlengin brand tha kher kher chauha inthuam tur emaw ti kan tam tawh’ in ti rilru ve fo in awm em? Kan phâk tawk aia sâng hret thawmhmnaw inbel thin kan ni a, mahni sum chu sawi loh, petrol man atanga spare parts thlenga nu leh pa ten neihthinglung an khawn dawt dawt ngai khawpa rualawh ngai thei lo, nu ber tãivawn thâwl huk khawpa Bike nalh awt tlat in hre ve em? In hria ang, an tam em alawm! Heng ho hian anmahni leh an chhungkua mai bakah, kan hnam thleng hian than an tithû a, hmasawnna kawng an dãl a ni.
Changkanna kan teh dan hi a dik tawk lo a nia aw; kan muang sual lek lek tawhin ka hria. Thawmhnaw nalh leh lirthei nalh, man to te hi changkang teh nan kan hmang tlat a, hei tak hi sim teh ang u, kan la phâk ve lo. Duh hun huna sa pawh hmeh zo mang lo, thingtlang kut hna thawktute thar sa behlawi hnah ilo vela inpak puar mai mai kan la nih hi. Nalh leh rimtui taka chhuak a, restaurant changkang ve taka chhun chaw fâk thin, mi in hnuai kan luah hawha haw leh zùl zúl thin kan ni. Mi in luah hmuhsitna a ni lo va, mi inhnuai luah zawng zawng kan rethei vek e tihna lam a ni lo. Mahni ina cheng sawmthum pakua pawh ni ila, kan nun dan phung hi kan sum thawh chhuahin a ûm vawn vawn a, a ûm phâk si lo a ni kan ti a nih hi.
Hna thawh kawnga hlawhtlin loh sa nâk alaiin, hringnunah kan la fail zui! Nun ze mawi hrang hrang kan hloh hnem tulh tulh a, tawngkam kan thlahdahin pawisak kan nei lo tulh tulh bawk. Thawh chhuah nei lem lo rau rau-ah, thiante leh nu leh pa zâra thlamuang taka la rûi ham ham ngam kan tam lutuk te hi, khawvel huap leh mahni vêng huap pawhin a zahthlak. Pathian hian nu pum chhung atanga hlawh tling tura a ruat bik, ‘khai, ani hi chu mal ka’n sawm teh ang. Ani hi chu tluang takin hringnun chhiar chho se la, mi awh rawn tur khawpin a zirna kawngah mal ka sawm bik ang a, hna tha tak hmu bik bawk rawh se’ tih a nei lo.
Pathianin, ‘ani hi chuan drug addict rawh se. Ani hi chuan zu ngawl vei rawh se; tih emaw, ‘ani hi chu a ruih luat vangin naupang têin accident-in boral rawh se’ a tih pawh ka ring leh chuang miah lo; lo ti ta se hmangaih Pathian kan biaka hi, Pathian fair lo tak a ni dawn, a theih loh! Awlsam leh hahdam, nuamsa uchuak taka bul tan millionaire an awm lo, an bul tan dan hrang hrang hi internet kal tlangin duh thâla chhiar tur a awm. A then mi dawra inhlawha bul tan, a then coffee dawra bul tan, a tam, kan sawi vek sêng dawn lo. A pawimawh ber chu hna reng reng, thawh hreh neih loh hi a ni a, a dawtah taimak. Nawmsak hmasak kan tum hian kawng thui tak kan bo tihna a ni a, harsatna laka tuar zuau lutuk hi hlawhtlinna hmelma a ni.
Hmeichhia kan pawimawh e. Kut hna thawh hreh lo tlangval na na na chuan, thawmhnaw man to leh lirthei kawl fur lem lo mah se, pawisa an nei tal alawm. Kan star duh zawng, luck tura kan siam mipate hi kan thlâk danglam dáwrh thei asin. I fate diaper tur leh zel pawh i pasala nu (MIL) hnena dil kha thil nuam tak a ni lovang. Tlangval inchei nalh, iphone hmang, bike fai tih vel mai mai khan riltàm a hnêm lo, chaw a awm lo! Nau vawi khat neihna senso takngial pawh an nu leh pa ten bill an peksak ngai tlangval kha chu, i fa pathumna bill pawh a nu leh pain bill an pe tho ang.
Retheih hi chuan hmangaihna te hi thinchhiatnaah te, thinrimnaah te, mittuiah te a chang thei. Oh, ka sawi hmaih têp, sâwt tawh miah lo tura inchhirna pawh hi a free gift! Nulain kan ngaihsan zawng thlang thiam ila, mipate paw’n in thlan thiam a ngai tho, kan tih tur chu ‘mi dik leh taima, mahni nihna mila khawvela chêng, eng hmai kâwr mah vuah lo’ hi an ni tawp mai a ni. Kan hringnun hi keimahni chher a ni a, kan hun hman lai leh kan nakin hun tur pawh keimahni thovin a ni, a kawng sial ni. Kawng nãl tak, tawlh thlûk mai hlauhawm(hringnun)-ah kan kal ve a nih si chuan, kan kalna tur rahbi chher nan Hrei hriam tak hman a tul a ni. Mi fa ten hlawhtlinna tlâng chhîp an thlen khalh hma chein, i rahbi tuk ve fat fat rawh lem!