Zonunkima
4th semester
Government Aizawl West College
-- Advertisement --
Tunah chuan ‘Digital world’-ah kan cheng a ni ta ber a, Social media hian Khawvel a tuam hneh ta em em a. Khawvel pumah mi Tluklehdingawn 5.04 chuangin social media kan hmang mek a, chu chu khawvela mihring awm zât a chhutin 61.4% lai a ni. Kan tawng a mi thumal ang mai a kan hman làr, kan society-a mikhual lo tak mai social media hian thalaite a thunun (influence) nasa em em mai a, a thatna Chen a awm a that lohna pawh a nei ang. Engpawh nise, thalaite hian social media hi eng ang takin nge kan lo hman? kan hmang thiam rêng em? tih I han chai dawn teh ang.
SOCIAL MEDIA KAN HMAN DAN
Kum 2021 khan Dr. Esther Lalnunpuii leh Dr. R.K Ngurtinkhuma te chuan Mizoram College of Nursing a zirlai 96 te hnenah zir chianna an nei a. Chu an zir chianna atanga a lan dânin zirlai 56.25% te chuan ni khatah darkar 2 atanga darkar 4 social media khawih thin an nih thu an tar lang a. Tin, 21%-te chu nilenga online thin angin an chhinchhiah bawk.
Application an hman tam ber te-
WhatsApp 92(95.83%)
Facebook 71(73.95%)
YouTube 68(70.83%)
Instagram 52(54.16%)
Google+ 14(14.58%)
Academia.edu 8(8.33%)
Kum 2019-a Dr. Esther Lalnunpuii, Dr. Manoj Kumar Verma leh Dr. R K Ngurtinkhuma-te chuan Regional Institute of Paramedical and Nursing Science (RIPANS), Aizawl a zirlai 146 zir chianna an neihah chuan ni khata social media an hman zat chu hetiang hi a ni:
Darkar 4 aia tam – 73%
Darkar 2-4 – 13%
Eng lai pawha online reng – 11%
Darkar 1-2 – 3%
An hmanna berte lo en leh ila:
For sharing video and photos – 94%
For entertainment – 91%
For finding information – 87%
To find new friends – 63%
To contact with friends – 60%
For keeping up-to-date – 47%
Academic purpose – 21%
Datareportal-in social media hmang nasa zual ramte a tar lan danin-
1. Kenya – 3 hours and 43 minutes
2. South Africa – 3 hours and 41 minutes
3. Brazil – 3 hours and 37 minutes
Social media hmang tlêm ram te lo en ve leh ila:
1. Japan – 51 minutes
2. South Korea – 1 hour and 6 minutes
social media khawih nasa zual ram te khi Brazil tih loh chu Ram reithei leh hnu fual tak tak mi rethei tamna te an ni hlawm a. A khawih tlêm ram te erawh ram taima, hna thawk nasa leh hmasawn ber ram an ni thung. A lehlamah mizoram a college zirlai ten social media nitin kan hman dan darkar 2-4 a nih chuan mizo thalai te hian social media kan lo va khawih nasa dawn em. Social media hian kan hun ringawt a ei hek lo, ka hna/tih tur te min thulh tir a, hriselna a khawih chhe nasa em em a, mental health thlenga nghawng nei theiin Mi tam takin depression leh anxiety an neih phah a, mi dâwngdah a min siamtu a ni a, bul hnaia mite pawh ngaihsak lêk lova min ti ‘social’ lotu a nih theih avangin a chin tawk kan neih a, kan khawih tlêm ngai a ni.
KAN HMANG THIAM RÊNG EM?
Annual Status of Education Report (ASER) 2023 in thalai kum 14-18 inkar, Aziawl district chhûnga khaw 60 thlan chhuah a survey an neih a an hriat chhuahah chuan, Social media hi mizo thalai te’n an hmang tam a, hman dan erawh an thiam lo tih a ni. An hun hman hnem ang aiin online service hrang hrang ( ticket booking, online a bill pek, online a form fillpup etc) thiam erawh an awm mang lo tih a ni.
Heta lang Chiang leh ta chu thalai te hian social media chu video ho tak tak, Status ho te te en leh pho lana, mi thlalak post te lo comment mai mai hi nuam kan ti a, thiante leh ngaihzawng te nen a inbiak mai mai nan kan hmang ber a ni tih a ti chiang hle awm e. Mawhpuh tur an awm a nih chuan keini a hmangtute ngei hi kan ni. Chem a ni tih hre reng chunga kan inzai luih chuan chem ni lovin keimahni min dem ang. Chutiang chiah chuan social media pawh hman nasat a that lohzia hre reng chunga kan hman tam luih a, kan career a tih chhiat chuan a hmangtu, keimahni mawh a ni. Chuvangin social media hman tlem a, hman thiam hi kan ngai tak zet a ni
A SÎR LEHLAM A|ANGIN
Thil reng reng hian thatna leh that lohna a nei. Social media pawh hian thatna tam tak a nei ve bawk. A bikin entrepreneurship leh marketing-ah a tangkai zual em em a ni. Kum 2019 khan R. Lalrampuii chuan Aizawla social media platform kal tlanga marketing a zir chiannaah chuan social media chu products leh service chungchanga information an hmanna ber a ni a. Poducts zawrh leh service kawngah Social media leh a hmangtu chu thuk takin a inzawm a a, social media chu new word of mouth (tawngkaa inbiak pawhna ang) a ni a ti hial a ni. Entrepreneurs tam takin social media chu an business advertise nan an hmang a. Social media hmang tam takin an kutkawih, thuamhnaw, pheikhawk, makeup leh food catering zawrh nan an hmang tangkai hle a ni.
Zirlai tam takin kan zirlai puitu atan kan hmang tangkai hle a, hriat zau nan te, chanchin thar ber ber kan hriat nan te, hmun hla taka kan thian te leh chhung khat laina te nen a min inpawh tirtu a ni bawk a, sorkar laka kan lungawi khona te, kan duh khawp lohna leh nawr kal nan te kan honang thei a, kan dikna chanvo (rights) au chhuahpuina hmanraw tha tak a nihna te, information kan inpekna ber a nih tawh avâng tein hman loh ngawt erawh a tha ber Chuang lo.
KC Zalena, 2022 MCS topper, UPSC mock interview hmachhawn zo deuh chiah chu, social media a hman dan ka zawhna ah chuan heti hian min chhang a-
1. Exam tura a inbuatsaih laiin whatsapp, Facebook te a delete tawp a, YouTube erawh zirlai puitu, inbuatsaih nan a hman thu min hrilh a.
2. Ni khatah darkar 1 vel social media khawih nan hian hun a hman thu a sawi bawk.
3. |halaite tan social media hman tam nge hman tlem tha zawk ang tih ka zawh chuan, “social media hman tlem ka duhpui zawk, hman loh tawp erawh ka support chuang lo, an zirlai puihna atan te a tangkai ve avangin” tiin min chhâng a ni.
TLIPNA
Social media hi Mihring te siam ani a, chuvangin thunun theih thil a ni. Mihring te hi inmamawh tawn kan nih ang chiahin Khawvel thang zelah Social media leh mihring te pawh hi kan inmamawh tawn a ni. Mihring te tello in social media hian awm zia a nei lo vanga, social media tel lovin mihringte kan awm thei tawh hek lo vang. Khawvel awm chhung chu social media hi a awm tawh dawn tlat a, technology sáng chho zelah a changkangin a changtlung telh telh dawn. Changkanna in a ken tel a nih vangin khawih ve tur pawh kan ni, amaherawhchu changkanna Chen luat vangin kan hma hun tih chhiat tir nan kan hmang tur a ni lo, phal pawh kan phal bawk tur a ni lo. Khawvel Inher dan Mila kan insiam rem ve zel hi a ngai a, a hleihluakin khawih lo ila, kan zirlai, kan hna, eizawnna leh tih tur tul dangte bahlah Chuang si lova hma lama ke kan pên a, state dangte kan um phak ve theih nan, social media hi thalai te’n I hmang tlem ang u.
Ephesi 5:16 “I hun chu a tha thei ang berin hmang rawh.”
Reference:
1. 31st January, 2024. Datareportal. ‘The time we spend on social media.’
2. Lalremruati Khiangte & William Lalramhmachhuana . A case study on the use of social media by a health professional in Aizawl. 1 June, 2020
3. Dr. Esther Lalnunpuii & Dr. RK Ngurtinkhuma. Usage of Social Networking Sites by the Students of Mizoram College of Nursing, Aizawl, India: A Study. October 2021
4. Patrina VL Hruaitluangi. ASER report zirchianna. 4th March, 2024 Vanglaini
5. Dr. Esther Lalnunpuii, Dr. Manoj Kumar Verma, Dr. R K Ngurtinkhuma. Usage of social networking sites of college students, a case study of Regional Institute of Paramedical and Nursing Science (RIPANS) Aizawl. October 2019.