Thang pahnih a per \helh chuan IAF-ah tho…

Mizoram Legislative Assembly 9-na session kal mekah, nimin khan Tuirial bialtu K.Laldawngliana resolution “Mizoram sawrkarin Lengpui Airport, Indian Air Force kuta hlan/hralh tuma hma a lak mek hi tha ka ti lo a, titawp rawh se” tih chu sawiho a nih hnuah House chuan a hnawl.
Hetih rual hian, House Leader chuan, Lengpui Airport chungchanga hmalakna kal mek chu Mizoram sawrkarin sum lama harsatna a neih vang a nih thu sawiin, ‘sum nei ila, tuma hnenah hlan kan tum lovang’ tiin a sawi a.
Hetih lai hian, tun dinhmunah duhthlan tur pathum a awm thu a sawi thung a. Pakhatnaah chuan, NGO Coordination Committee te nen theih tawpin 16th Finance Commission an dawr ang. Pahnihnaah chuan, Airports Authority of India lam biak leh a, an stand te tidanglam tura ngen. A pathumnaah chuan, duhthlan tur pahnihte a per thelh chuan Indian Air Force dawr leh tho tur; Cabinet-in an condition a pawm theih leh theih lohah a innghat ang.
“Mizo mipuite tana tha lo tur chu kan pawm dawn miah lo, kan tana tha tur erawh chu huaisen takin kan pawm ngam ang. Tute emaw sawisel avang ringawt leh thil tha kan tih pawh min sawisel duhtutena an sawisel rikngawt avang hian thil tha kan tih loh ngam phah dawn miah lo. Kan ram tana tha tur chu kan ti ang a, mahse, kan ram tana a tha lo a nih chuan kan ti hauh lovang, chu chu Mizo mipuite ka tiam duh..” tiin House Leader Lalduhoma, chief minister chuan a sawi a ni.
Kan hriat angin Lengpui Airport chungchang hian mipui ngaihven a hlawh a, social media lamah pawh hmun luah zau ber a ni hial awm e. Hetia Assembly House-a private member resolution zinga pawh fuha a tang pawh hi a lawmawm hle a, thil awmzia chiang zawkin mipuiin kan hriat theih phah bakah, hmalak zui dan tur pawh chiang zawkin a hriat theih phah a. House leader-in House chhunga a sawi chhuah, ‘duhthlan tur pathumte’ hi mipui pawhin kan thlir zui dawn tihna a ni a. A hmaa inhnialna leh chiang lo ruaia ngaihdan hrang hrang sawi nuaih nuaih ang kha he duhthlan tur pathumte hian a rawn luahlanin inhnialna pawh a rawn thelh ta tihna a ni. Sawi zui tur a awm ta vak lo; thang pahnih a per thelh erawh chuan, IAF lam kan hawi leh thup dawn tihna a ni a. Mipui aiawha rorel tura mipuiin an thlanchhuahte hian, ram leh hnam tana tha lo tur chu an hre em em ang tihah hian innghat thiam ila, a hahdamthlak mai awm e.