Thawhtanniah Saudi Arabia-ah US-Ukraine inbe dawn

Thawhtanniah Saudi Arabia-ah US-Ukraine inbe dawn
Volodymyr Zelensky-a chuan Ukrainian leh US aiawhte chu Thawhtanni hian Saudi Arabia-ah an inbe dawn tih a sawi a, hemi hma chiah hian US-Russia inbiakna a awm bawk ang.
Ukrainian hruaitu hian Russian President Vladimir Putin-a chu ‘indo tihrei nan tul lo thil phut lo’ turin a ti a. Moscow hian sipai thila Ukraine puihna pek thin tihtawp vek a phut a ni.
Zelensky-a hian Putin-a’n ‘Nato-a Ukraine tel loh’ a tih pawh inremna atana tel lo, ‘Russia tana thil pek duhthusam’ mai a nih zawk thu a sawi bawk.
White House-in President Donald Trump nena an inbiaknaa Ukraine-a nuclear power plant-te US-in neih vek a sawi pawh a dik vek lo tih a sawi bawk.
Inbiakna lo awm tur hi kum thum chuang lo indo tawh ram pahnihte inkara inkahhai a awm theih nana US-in palai hna a thawh mek kal zel a ni.
Zelensky leh Putin hian inkahhai hi a hrang hrang ve vea US-in a a thuphungin an pawm tawh a; mahse, a tak taka thil kalpui a la awm lo.
Russian hruaitu chuan energy hmunte inkahsak loh turin a pawm a, tun thlengin an la inkap zel thung.
Zelensky-a chuan Thawhtannia inbiakna turah hian Ukrainian aiawhte chuan US hnenah Russian beihna laka an engery hmun hum tura a duhte a hlan dawn tih a sawi.
White House-in US chuan Ukraine-a nuclear power plant-te a nei vek dawn nia a sawi chu Norway Prime Minister Jonas Gahr Støre nen Oslo-a thuthar lakhawmtute an kawm dunaah Zelensky-a hian a nih loh thu a sawi.
Russia-in an luah mek, Zaporizhia power plant chungchang chu President Donald Trump-a nena an inbiaknaah an sawi ngei a sawi a, ‘nuclear power plant zawng zawng chu Ukraine mipuite ta’ a nih thu a sawi.
Hetih rual hian US-in plant hi Russia kut atanga lak let thu leh tihchangkanna tura sum thawh chu an sawi tel thu a sawi bawk.
US Secretary of State Marco Rubio-a chuan a hmain US-in a neih chuan ‘a himna atan a tha ber dawn’ tih a lo sawi tawh a ni.