Thenzawl Peace City leh a behbawm…

Mihring nuai 10 vel len theihna tur khawpui thar ‘Thenzawl Peace City’ tia hming vuah chu a master plan duang tur agency dap mek a nih thu tunhnaia chief minister hova thutkhawmnaah tarlan a ni a. He hmalakna hi Aizawl khawpui tawt lutuk tihziaawmna leh Mizoram-in khawpui changkang zawk a neih theihna tura ruahmanna a ni a; chief minister hian hemi chungchangah hian sawrkar laipui thuneitute a lo sawipui tawh thin a ni awm e.
Ram square km 108 huam chhung velah plan hi siam tum a ni a. Hectare khatah mi 100 vel awm thei tura chhutin, urban area bik sq km. 82 velah mi nuai 10 vel thawl nuam taka khawsa thei tura ngaih a ni. Tunah hian Thenzawlah mihring singkhat vel cheng mek anga ngaih a ni a; he khawpui thar tur hian tuna Thenzawl mipui zat let 100 vel a dawl thei dawn tihna a ni.
Aizawl khawpui hi, kawngpui thar siam belh theih a nih tawh loh laiin, lirthei erawh a pung chak a, tun dinhmunah chuan nunphung pangngai khaihlak khawpin khawpui a tawt tawh a ni. Hei vang hian Greater Aizawl emaw New Aizawl emaw din rawtna thawm hriattur a awm chamchi a; mahse, khawpui thar din emaw, khawpui tawt tihziaawmna emaw lam hawia hmalakna liantham hi hmuh tur a awm lo a tih theih awm e. Chutih ahnekin, khawpui laili lamah mipui fuankhawmna tur infrastructure din kan la tuipui zawk tlat niin a lang.
Tuna Thenzawl Peace City pawh hi Mizoram capital atana duan a nih thu sawi lan a ni chiah lo va, tuna kan hriat theih chinah chuan “Sawrkar hmunhma, nakin zela la chhawr tangkai tur ruahman tel ni se” tih a la ni deuh mai a, “Aizawl khawpui thlakna tur” tih a ni chiah lo.
Mizoramah hian khua 800 velah mihring nuai 13 vel awm anga ngaih a ni a; chawhrualin khaw tinah mihring 1625 vel awm ang kan ni. Tun dinhmunah Aizawl-ah hian mihring nuai 4 vel awm anga ngaih a ni a, chuti a nih chuan Aizawlah hian Mizoram mihring hmun thuma thena hmun khat thuak an awm tihna a ni.
Tuna khawpui thar din turah hian mihring nuai 10 vel leng thei tur a nih chuan, thingtlang khua tereuhtê tê hi sawikhawmin khawpui tharah hian suan luh ni ta se, hmasawnna hnathawh semzai kawngah hma kan sawn phah dawn a ni. Hei hi Viksit Bharat 2047 chhawr tangkai nan hmang thiam bawk ila, kan changkan phah ngei a rinawm.
Eng pawh ni se, sawrkar laipui lam hian khawpui thar dinna tur sum leh pai rawn theh chhuak phur viau dawn pawh ni se, master plan la duang leih leih chauh tur kan nih avangin, a puitlinna tur chuan thangkhat lian zet zawt chu a duh dawn tih a hriat a ni.
Chuvangin, tuna kan khawpui tawt zet mai, hmun hnih khata chhiatna a thlen pawha inkalpawhna ping nghal vekna hi, a “Greater” zawnga hma kan la thei rih lo a nih pawhin, khawpui vet kualtu kawngpui (Ring-road) changtlung tak siam hi chu tihmakmawh a ni.