Thenzawl SDO(C) in revenue lam a khawih tel tawh dawn
Thenzawl SDO(C) in revenue
lam a khawih tel tawh dawn
Revenue thuneihna kenkawh kawnga SDO (Civil) tha tihchak dan tur ngaihtuahin Land Revenue & Settlement minister B Lalchhanzova chuan January 23 khan Thenzawl a tlawh.
Thenzawl Civil Sub Division tichak a, SDO (Civil) office-in revenue thuneihna an kenkawh dan tur ngaihtuah a ni a. Minister chuan revenue kalphung siamthat kawngah deputy commissioner atanga bul tan a, DC administration zawng zawng rawn ti revenue a, mipui leh sawrkar tana hmasawnna duhawm tak administrative reform an thlen thei chu a lawm hle tih a sawi a. District-a settlement officer-in thuneihna a neih ang zawng zawng kha SDO (C) hian ama huamchhungah a nei ve dawn a, mipui harsatna tawh thin tam tak a sukiang dawn tih a sawi a ni. SDO (C) Thenzawl chuan Sub Registrar Office mawhphurhna a neih belh tawh dawn a, Vairengte leh Thenzawlah bul tanin Mizoram puma Civil Sub Division zawng zawngah kalpui vek a ni dawn tih a sawi.
Revenue department siamtha tura tan an lak dan B Lalchhanzova hian a sawi a. Tun dinhmunah engemawchen danglamna thleng tawh mah se, fel lo lai leh siamthat ngai a la tam hle tih sawiin, “Thawktu indaih lo, inrelbawlna leh hnathawh dan phung siamthat leh chinfel ngai a la tam,” a ti a. An sawrkar kum chanve chhunga Revenue leh Supply department hnuaia hma an lakna a bua siam a ni dawn tih a sawi bawk.
Revenue secretary Vanlalmawia chuan revenue administration tichak tura hma an lakna a sawi a. DC office-ah bul an tan a, DC chu district revenue administration-ah thuneihna sang zawk pek a ni tih a sawi. Anmahni Sub Division huamchhungah SDO (C) pawh ‘assistant commissioner (Revenue)’ tia ‘designate’ an ni, tiin, district headquarters-a kal kher ngai loin stamp & registration, revenue court leh land survey and settlement ah anmahni bial chhungah revenue thuneihna an nei tawh dawn tih a sawi a ni.
Revenue director R Lalthazuala chuan, SDO (C) Thenzawl-ah bul tanin SDO (C) office chu Revenue office leh Sub Registrar office tak tak anga thawk turin office building leh thawktute quarters tihlen leh sak belh a ni dawn a, staff dah belh an ni dawn a, land records pawh Serchhip atangin Thenzawlah transfer a ni dawn tih a sawi.