Mizoram thalaite leh kutthemthiamte tana an thiamthil siam phochhuahna – 3rd Mizoram Innovation Competition & Exhibition Fair – PUM 2023 chu Zirtawpni khan khar a ni a, thil siam zinga titha zualte hnenah lawmman pek an ni.Labour, Employment, Skill Development & Entreprenuership Department (LESDE) leh Ministry of Skill Development & Entreprenuership (MSDE) tangdun buatsaih kharna hi chief minister Zoramthanga’n a hmanpui a. Thalaite thil siamchhuah tha tak tak hmuh chu a tuiawmin chhuanawm a tih thu a sawi. “Vawiina a bul kan tan mek PUM zarah hian industry lian zawk an lo la chhuak ngei dawn a, ngaihtuahna thar nei chunga hna lo thawk zel turin ka chah che u,” a ti.
LESDE minister Lalchhandama Ralte chuan PUM bakah hian ITI zirlaite tan ‘Kawtchhuah’ an buatsaih thin tih a sawi a. Tunhma chuan LESDE department chu mite hriat hlawh lutuk lo a ni thin a, tunah chuan Mizoram sawrkar hmalakna azarah thalaite inpui, thalaite rahbi tuk hna thawktu department pawimawh leh thangduang ber a ni chho mek tih sawiin, “Mizoram sawrkarin thalaite hmakhua a ngaihtuah vanga hetiang dinhmun thleng thei hi kan ni,” a ti.
Industrial Training Institute Aizawla neih PUM 2023 ah hian thilsiam phochhuak 64 an awm a, an zinga 9 hi ITI-a zir mek, 11 hi ITI zirchhuak tawh an ni. Inelna hi engineering leh non-engineering huangah thenin, engineering huangah mi 28 an inel a, non- engineering ah mi 39 an tel. Exhibition a nih tel avangin sawm bik stall hawng tur mi 8 nen a vaiin stall 78 a awm a ni.
PUM 2023 hi Skills Strengthening for Industrial Value Enhancement (STRIVE) leh Atal Incubation Centre – SELCO Foundation (AICSF) sum hmanga buatsaih a ni.
-- Advertisement --
Engineering Category:
1-na: blackwire siamna khawl photu Malsawmna Blackwire, Tuithiang
2-na: wireless water pump controller siamtu J Lalremtluanga, Lungleng I
3-na: waste oil thuk siamtu F Lalnunfela, Zemabawk Vengthar
Non-Engineering Category:
1-na: Bamboo tea siamtu Lalmalsawma, Ramthar Veng Aizawl
2-na: Eco board siamtu Kane Vanlalhriatpuia, Republic Vengthlang
3-na: State Visual Documentation & Production, College Veng Aizawl
Lawmman dang buatsaih dawngtute:
# ITI Achiever Award : Lalzamliana Sailo, Fancy Electronics
# Best ITI Students Award: Albert Lalrindfela, electrical accident protector siamtu
# People’s Choice Award (engineering): COPA 2023-24 batch ITI Aizawl, software web application siamtute
# Peoples’ Choice Award (non engineering): V&B Epoxy & Wood Turning, Mission Vengthlang Aizawl
# Best Innovator Award (mi pahnihin an dawng): Lalhruaitluanga, New Serchhip Bazar, animal feed cutter siamtu leh J Lalremthanga, Lungleng I, wireless water pump controller siamtu