Thing hi duh duha kih theih a ni lo

Thingkung a awm a, a hnah a til a, a hnawk tia kih ngawt theih a ni lo. A par leh a hnah hi taxi-ah a tla tia kih ngawt theih a ni lo a, kawng a tihnawk tia kih ngawt te, chu chu a dal tia kih ngawt te hi a lo theih ngawt loh.
Guidelines for Felling of Trees from Non-Forest Areas a awm a, thingkung hi duh duha kih theih a ni lo.
Tun hnaiah speaker bangla kawta thingkung an kit a, dan bawhchhiatna a ni tiin a kittute chu pawisa chawitir an ni.
He thila pawisa inchawitir hi dan lekkawhtute’n an tih tur an tih ve reng vang a ni lo a, nawrtu an awm vang a ni.
Tunlai khawvelin thingkung a ngaih pawimawh em em laiin tun hnaiah speaker bangla kawta thingkung an lo kit a, Centre for Environment & Social Justice (CESJ) te’n hemi chungchangah hian Aizawl DFO (Divisional Forest Officer) hnenah ziaka thlenin, “Tunlai khawvelah environment pawimawhzia uar taka kan sawi lai leh a humhalh kawngah pawh sorkarin nasa zawka hmalak a tul laia assembly speaker bungalow-a thingkung kih fai deuh vek a ni hi CESJ chuan a hrethiam lo hle a,” tiin hmala turin an ngen a ni.
He thil hi bawhzui a nih loh chuan court-ah kalin PIL an thehlut ang tih an sawi.
Forest department-in bangla enkawltu PWD lamah an bawhzui a, PWD hian June ni 6 khan Rs 5000 an chawi ta a ni.
“Speaker bungalow-a dan bawhchhiatna a thleng leh dan siamtute zingah pawh speaker kawt a ni kha CESJ chuan dan pawisak lohna lian taka ngaiin Ni 04.06.204 khan DFO, Aizawlah action la tura ngenna kan lo thehlut tawh a nih kha,” CESJ chuan an ti a, an ngenna ngai pawimawha forest department-in an bawhzui avang leh PWD-in hremna an zawm avanga an lawm thu an sawi.
Guidelines for Felling of Trees from Non-Forest Areas tih hian a huam zau a, mimal ram, vantlang ram, tlawmngai pawl ram te pawh a huam vek. Chung hmun hrang hrangaa thingkungte chu DFO-in an chhinchhiah vek tur a ni. Kih a ngai a nih chuan dil a ngai a, a dil dan tur pawh ‘prescribed form’ hmangin DFO hnenah dil tur a ni.