Thingtlanga ran vulhtute tan vety service pe dawn

MzSRLM buatsaihin Accredited Agent for Health and Extension of Livestock Production (A-HELP) chu Zirtawpni khan AH & Vety minister C Lalsawivunga’n a hawng.
A-HELP hi Deendayal Antyodaya Yojana- National Rural Livelihoods Mission (DAY-NRLM) hnuaia Ministry of Rural Development leh Department of Animal Husbandry & Dairying thawhona niin, he hmalakna atang hian thingtlanga ranvulhtute tan vety service pek a ni dawn.
Minister chuan Mizoramah ran vulha eizawng an tam a, anmahni viltu tur vety mithiamte erawh an indaihlo nasa tih sawiin, he harsatna hi A-HELP hmalakna hian a phuhru chho zel dawn tih a sawi. A-HELP kaltlang hian department hna – ran damlo enkawl, vaccination, artificial insemination, bank loan buaipui sak, awareness campaign leh animal registration chu tih a ni dawn tih a sawi a ni.
He hmalakna kaltlang hian DAY- NRLM hnuaia self help group member hmeichhia, livestock community resource persons (LCRP) a thlante chu tangkai taka hman tum an ni.
A-HELP ni tur hian DAY-NRLM hnuaia LCRP ni mekte chu master trainer-ten a bik taka training an pek a ngai a. Master trainer turte hi National Dairy Development Board, Anand Gujarat-ah ni 6 training an paltlang hmasa a ni. Mizoram atangin master trainer tur Vety department aiawh doctor 4 leh MzSRLM aiawh mi 2 ten kumin January 22-28 khan training an paltlang tawh a ni.
Batch khatah mi 25 zel training pek tur a ni a. Hemi atan hian MzSRLM hnuaia LCRP 25 thlanchhuah Serchhip leh Kolasib district amiten training an nei dawn. A-HELP certificate dawngte chu AH & Vety department leh MzSRLM ten tangkai taka hman zui tur a ni a. Thlatina an hnathawh tur chu Vety department-in guideline zulzuiin a duang ang. Training hi a tahtawla neih chhoh zel tum a ni.