Thla 19 hnuah Hamas-in US mi an hren chhuah

Thla 19 hnuah Hamas-in US mi an hren chhuah
Israeli-American, Hamas-in Gaza-a thla 19 lai an hren tawh, Edan Alexander-a chu chhuah a nih hnuah a chhungte nen Israel-ah an inhmu leh ta.
Kum 21 mi hi October 7, 2023-a Hamas-in Israel an beih lai hian Israeli sipai niin Gaza ramria a awm lai a ni.
Thawhtanni khan Israel chuan an inhlan chhung atan Gaza-a sipai chetna a chawlhsan a. Hamas hotu sang chuan mi hren an chhuah hi thil tha an duh vang a nih thu leh US President Donald Trump-a’n Thawhlehnia Middle East a tlawh ruala inkahhai a awm an beisei tih a sawi.
Alexander-a hi Hamas-in an hren zinga US khua leh tui la dam awmchhun nia hriat a ni.
President Trump-a pawhin chhuah a nih tak avangin a chhungte a lawmpui thu a sawi.
Television-a thlalak tihchhuahah Alexander-a hian hlim takin Israeli sipai hmunah a nu leh pa leh a unaute a kuah lai a lang a. A chhungte nen US president chungah an lawm thu an sawi rualin Israeli sorkar leh inbiaknaa telte chu mi dang 58 la hrente an chhuah vek theih nana hma la turin an ngen.
Alexander-a hi thla hnih awh inkahhai a tawp hnua March 18 atanga Israel-in thapui a thawh leh hnua Hamas-in mi an chhuah leh hmasak ber a ni.
Hamas chuan Alexander-a chhuah hi Gaza-a puihna a luh theihna tura inremna a awm theih beiseina nena an tih a nih thu an sawi bawk.
Israel chuan ni 70 chhung Gaza-a ei tur, damdawi leh puihna dang lut tur a dang tawh a, puitu pawlte chuan tama mi dah hi indonaa dan bawhchhiatna a nih thu an sawi.
Hamas hian indona tawpna tur atan chauh inremna an siam tur thu an lo sawi tawh a. Hei hi Israeli Prime Minister Benjamin Netanyahu-a chuan a duh lo.
Trump-a chuan Thawhlehni khan Middle East a thleng a, Israel chuan a cham chhunga inremna a awm lo a nih chuan na zawka Hamas beih an tum tih a sawi lawk.
Israel hian Ninganiah hian mi hren dang chhuahna tura indawr turin Qatar-ah a aiawh a tir leh dawn a. Qatar leh Egypt chuan Alexander-a chhuah a ni chu inremna thar a awm theihna tur kawng a ni thei tih an sawi.
October 7, 2003-a Hamas-in Israel an beih khan mi 1,200 chuang thatin hren turin mi 251 an hruai tel a. Mi 58 la kawlin an zinga 23 chu an la dam nia hriat a ni.
Israel-in Hamas beihna a tawh chhan let nana Gaza a beih letnaah mi 52,829 an thi tawh bawk a ni.