Thlai thar leiah pass mark…

Thlai thar lei chungchangah ZPM sawrkarin pass mark tha tak hmua a ngaih thu adviser to chief minister (hand holding) chuan tunhnai khan a sawi a, an pass-na division erawh mipuiin an pek tura a ngaih thu a sawi bawk.
Thlai thar lei chungchangah kher hi chuan, an pass-na division lo hniam deuh ta pawh ni se, sawrkar kal tawhte ai chuan ZPM sawrkar hian an titha zawk tiin a sawi theih mai awm e. Sawrkar kal tawhte khan sawrkar flagship programme tha tak tak chu an kalpui ve tho a, mahse an programme hlawhtlinna han sawi vul chuk tur kha a awm zui hran bik lo. Chutih rualin, lo thatpui tawk chu an awm lo a ni bik lo a; anni pawh, an pass-na division a sang lua lo, tiin a sawi theih bawk ang.
Tuna sawrkar hian kum thum leh a chanve vel hun an la nei a, an term chhung hian eng angin nge kuthnathawktute an dawmkan hman dawn tih chu Mizoram mipui thlir ber tur a ni. Tun dinhmunah chuan a engkim mai hi ‘kan la inpeih lo’ tih vekna hnuaia kal a la ni rih deuh mai a. ‘Research base’ tih tawngkam pawh a chuai leh tan ta niin a lang. Sawhthing processing lamah pawh, ‘kan la inpeih hman lo’ tih a ni a, sawrkarin sawhthing a lei khawl pawh man tlawmtein a hralh leh a, ‘chuti zat chu kan hralh tawh’ tih velin kan la in-awi mai mai a ni ber a. Ram danga thawnchhuah tih pawh, tunhmain lakhuihthei leh dragon fruit thawn chhuah tur minister meuhvin an vai liam thin a, tun thleng hian vai liam tur dang hi a awm zui tawh lo a nih hmel. Thawn chhuah tih pawh hi, a hming a ropui a, mahse, ‘Lawng lian container chuti zat’ tih chu a la hla hle.
Sawhthing hi Mizoram hming chherna atan hman an tum thu adviser to chief minister hian a sawi a. Hming chherna khawp hi chu state economy-in a thanlenpui theih chin tur hi a ni turah ngai ta ila. Sawhthing hian ram a tichhe chak hle niin mithiamte chuan an sawi a, state hming chherna tham tharchhuah kan tum bawk si chuan, kan environment dinhmun hi a ngaihtuahawm hlein a rinawm a. Hengte pawh hi, sawrkarin ‘hmingchherna khawpa’ hmalak a tum a nih chuan, tuna sawhthing quintal nuai 10 vel tharchhuah beisei atanga 10% vel la lei thei chauh a nih lai hian, eng tin nge vision an neih, tih hi zawhna pawimawh tak a ni. Ruahmanna lam inpeih tak tak hma hian thil hi kan sawi leh mai thin nge, ruahmanna (policy) a awm tawh a nih chuan, mipui pawhin an hre chak dawn a, kuthnathawktute pawhin division sang tak an pek phah maithei a ni.